प्रेमसंबंधासाठी आईच बनली खुनी! ६ वर्षांच्या मुलाचा थरारक अंत

पुणे (Mother Kills Son) : माणुसकीला काळिमा फासणारी आणि अंगावर शहारे आणणारी घटना पुणे जिल्ह्यातील खेड तालुक्यात उघडकीस आली आहे. अनैतिक प्रेमसंबंधात अडसर ठरत असल्याच्या कारणावरून एका आईनेच आपल्या सहा वर्षांच्या मुलाची निर्घृण हत्या केल्याची धक्कादायक बाब समोर आली आहे. ही घटना खेड तालुक्यातील कुरुळी येथे घडली असून, आरोपी आईला पोलिसांनी अटक केली आहे. विशेष म्हणजे, ही बाब बीड जिल्ह्यातील माहेरी गेल्यानंतर उघडकीस आली.

प्रेमसंबंधातून निर्माण झाला वादाचा धागा

आरोपी बसरिन मेहबूब शेख (वय २७) हिचा विवाह सुमारे दहा वर्षांपूर्वी मेहबूब शेख यांच्यासोबत झाला होता. या दाम्पत्याला तीन मुले आहेत. मात्र, गेल्या चार वर्षांपासून पती-पत्नीमध्ये मतभेद वाढले आणि बसरिन पतीपासून वेगळी राहू लागली. याच काळात तिचे पतीचा मित्र राम विनायक कजेवाड याच्याशी संबंध जुळले.
पतीपासून वेगळे झाल्यानंतर दोन मुले वडिलांकडे राहिली, तर सहा वर्षांचा आवेज मेहबूब शेख हा आईसोबत होता. मागील चार महिन्यांपासून बसरिन आणि राम हे कुरुळी येथे लिव्ह-इन रिलेशनशिपमध्ये राहत होते.

लहानगाच ठरला ‘अडसर’

बसरिन आणि राम यांना आपले संबंध पुढे न्यायचे होते. मात्र, आवेज त्यांच्या नात्यात अडथळा ठरत असल्याची भावना त्यांच्या मनात निर्माण झाली. याच कारणातून त्यांनी या निरागस बालकाचा काटा काढण्याचा थरारक निर्णय घेतला.

निर्घृण हत्येचा थरार

४ एप्रिलच्या रात्री सुमारे साडेअकराच्या सुमारास या दोघांनी मिळून आवेजची हत्या केली. प्रथम त्याचे डोके बाथरूममधील पाण्याच्या बादलीत बुडवण्यात आले. त्यानंतर त्याचे डोके भिंतीवर आणि जमिनीवर वारंवार आपटून त्याचा जीव घेतला. या क्रूर कृत्याने परिसर हादरून गेला आहे.

हृदयविकाराचा बनाव; पुरावे लपवण्याचा प्रयत्न

घटनेनंतर संशय टाळण्यासाठी बसरिनने मुलाचा मृत्यू हृदयविकाराच्या झटक्याने झाल्याचा बनाव रचला. इतकेच नव्हे, तर पुरावे नष्ट करण्याच्या उद्देशाने ती मुलाचा मृतदेह थेट बीड जिल्ह्यातील आपल्या माहेरी घेऊन गेली. तेथे नैसर्गिक मृत्यू झाल्याचे सांगत अंत्यविधीची तयारी सुरू करण्यात आली.

आजोबांच्या सतर्कतेमुळे उघडकीस आला प्रकार

अंत्यविधीसाठी मुलाच्या वडिलांकडील नातेवाईकांना बोलावण्यात आले. आवेजच्या शरीरावरील जखमांचे निशाण आणि बसरिनची संशयास्पद वागणूक पाहून आजोबांना शंका आली. त्यांनी तातडीने परळी पोलिस ठाण्यात धाव घेत तक्रार नोंदवली. त्यांच्या सतर्कतेमुळे हा भयंकर प्रकार उघडकीस आला.

शवविच्छेदन अहवालाने सत्य समोर

पोलिसांनी मृतदेह ताब्यात घेऊन शवविच्छेदनासाठी पाठवला. वैद्यकीय अहवालात मृत्यू हृदयविकाराने नसून, डोक्याला झालेल्या गंभीर दुखापती आणि गुदमरल्यामुळे झाल्याचे स्पष्ट झाले.
त्यानंतर पोलिसांनी बसरिनची कसून चौकशी केली असता तिने गुन्ह्याची कबुली दिली.

आई अटकेत, प्रियकर फरार

खेड पोलिसांनी आरोपी बसरिन शेख हिला अटक केली आहे. मात्र, या गुन्ह्यातील तिचा साथीदार आणि प्रियकर राम विनायक कजेवाड हा सध्या फरार असून, त्याचा शोध घेण्यासाठी पोलिसांकडून विशेष पथके कार्यरत आहेत.

समाजातून संताप व्यक्त

आईनेच आपल्या पोटच्या मुलाचा जीव घेतल्याने संपूर्ण परिसरातून तीव्र संताप आणि हळहळ व्यक्त केली जात आहे. या घटनेने मानवी नात्यांतील अधोगती पुन्हा एकदा समोर आली आहे.

या प्रकरणाचा पुढील तपास पोलिसांकडून सुरू आहे.