रविवारी सायंकाळी 22 मार्चला लोकनेते व माजी खासदार दत्ता मेघे यांचे त्यांच्या पांडे लेआउट येथील निवासस्थानी वृद्धापकाळाने निधन झाले.
विदर्भाचा आधारवड हरपला ; दत्ताजी मेघेंना आज पवनारमध्ये अखेरचा निरोप
वर्धा (State Funeral) : लोकनेते व माजी खासदार दत्ताजी मेघे यांचे रविवारी (दि. २२ मार्च) सायंकाळी नागपूर येथील पांडे लेआउट येथील निवासस्थानी वृद्धापकाळाने निधन झाले. त्यांच्या पार्थिवावर आज (दि. २३ मार्च) सायंकाळी साडेपाच वाजता पवनार येथील त्यांच्या पितृगावी शेतावर शासकीय इतमामात अंत्यसंस्कार करण्यात येणार आहेत.
त्यांचे पार्थिव सावंगी (मेघे) येथील ‘संकल्प’ या निवासस्थानी नागरिकांच्या दर्शनासाठी ठेवण्यात येणार असून दुपारी चार वाजता अंत्ययात्रेला सुरुवात होईल. सावंगी (मेघे), बजाज चौक, शिवाजी चौक, धुनीवाले मठ चौक मार्गे अंत्ययात्रा पवनारकडे प्रस्थान करणार आहे.
दरम्यान, अंत्यविधीची पूर्वतयारी पवनार येथील त्यांच्या शेतावर काल रात्रीपासून सुरू असून जिल्हा प्रशासनाच्या वतीने संपूर्ण तयारी करण्यात येत आहे. आवश्यक सुविधा, सुरक्षा व्यवस्था तसेच नागरिकांच्या सोयीसाठी विविध कामे युद्धपातळीवर सुरू आहेत.
या अंत्यविधीस महाराष्ट्राचे मुख्यमंत्री देवेंद्र फडणवीस, केंद्रीय मंत्री नितीन गडकरी, महसूल मंत्री चंद्रशेखर बावनकुळे तसेच जिल्ह्याचे पालकमंत्री पंकज भोयर यांच्यासह विविध क्षेत्रातील मान्यवर उपस्थित राहणार आहेत.
दत्ताजी मेघे यांच्या निधनाने वर्धा जिल्ह्यासह संपूर्ण विदर्भात शोककळा पसरली असून मोठ्या संख्येने नागरिक त्यांच्या अखेरच्या दर्शनासाठी उपस्थित राहण्याची शक्यता आहे.