पोलिस यंत्रणेला धक्का देणारी एक गंभीर घटना समोर आली असून, एका महिला प्राचार्याला गुन्ह्यात अडकवण्याची धमकी देत लाखोंची खंडणी उकळल्याचा आरोप थेट काही पोलिस कर्मचाऱ्यांवरच झाला आहे.
पुण्यात पोलिसांवरच खंडणीचा आरोप ;पुणे पोलिसांच्या प्रतिमेला धक्का
पुणे (Extortion Racket) : शहरातील पोलिस यंत्रणेला धक्का देणारी एक गंभीर घटना समोर आली असून, एका महिला प्राचार्याला गुन्ह्यात अडकवण्याची धमकी देत लाखोंची खंडणी उकळल्याचा आरोप थेट काही पोलिस कर्मचाऱ्यांवरच झाला आहे. या प्रकरणामुळे शहरात मोठी खळबळ उडाली आहे.
मिळालेल्या माहितीनुसार, पोलीस उपनिरीक्षक अजित बडे, कर्मचारी सुदाम तायडे, दामिनी पथकातील काही कर्मचारी आणि सोशल मीडियावर ‘रील स्टार’ म्हणून ओळखली जाणारी सोनाली हिंगे यांचा या प्रकरणात सहभाग असल्याचे समोर आले आहे. संबंधितांनी अत्यंत नियोजनबद्ध पद्धतीने महिला प्राचार्याला लक्ष्य केले. तिच्याविरुद्ध ‘POCSO’ अंतर्गत गंभीर गुन्हा दाखल करून अटक करण्याची भीती दाखवत मानसिक दबाव निर्माण करण्यात आला.
या भीतीचा फायदा घेत आरोपींनी पीडितेकडून हप्त्यांमध्ये सुमारे ७ लाख रुपये उकळल्याचे उघड झाले आहे. यामध्ये सोनाली हिंगे हिचा वापर करून विश्वास संपादन करण्यात आल्याचीही माहिती पुढे आली असून, त्यामुळे या कटाची तीव्रता अधिक वाढली आहे.
दरम्यान, अजित बडे हे सध्या सायबर पोलीस ठाण्यात कार्यरत आहेत, तर सोनाली हिंगे आणि सुदाम तायडे हे शिवाजीनगर पोलीस ठाण्याशी संबंधित असल्याचे सांगितले जाते. या तिघांविरोधात बंडगार्डन पोलीस ठाण्यात गुन्हा दाखल करण्यात आला आहे.
या प्रकरणाची गंभीर दखल घेत पोलीस आयुक्त अमितेश कुमार यांनी तत्काळ कारवाईचे आदेश दिले आहेत. पोलिसच खंडणी प्रकरणात अडकले असल्याने संपूर्ण पोलिस दलाच्या प्रतिमेवर प्रश्नचिन्ह निर्माण झाले आहे. पुढील तपासातून आणखी धक्कादायक बाबी समोर येण्याची शक्यता व्यक्त केली जात आहे.