चिखली पाटीजवळ पिस्टलसह तरुणास अटक; हट्टा पोलिसांची धडक कारवाई

हट्टा (Hatta police action) : जिल्हा पोलीस अधीक्षक डॉ. निलाभ रोहन यांच्या आदेशानुसार अवैध शस्त्रसाठ्याविरुद्ध सुरू असलेल्या विशेष मोहिमेत हट्टा पोलिसांना मोठे यश मिळाले. गुप्त माहितीच्या आधारे चिखली पाटी, वसमत रोड येथे नाकाबंदी करून पोलिसांनी एका 26 वर्षीय तरुणाला गावठी पिस्टल व जिवंत काडतुसांसह अटक केली.

 19 मे रोजी सायंकाळी 5 वाजून 20 मिनिटांच्या सुमारास आरोपी सुरजितसिंग सुलतानसिंग टाक रा. फुले नगर, मानवत, जि. परभणी हा गावठी पिस्टल घेऊन परभणीकडे जात असल्याची माहिती हट्टा पोलिसांना मिळाली. माहिती मिळताच सहाय्यक पोलीस निरीक्षक संग्राम जाधव यांच्या मार्गदर्शनाखाली ग्रेड पोउपनि सिरसेवाड व पथकाने चिखली शिवारातील छत्रपती ढाब्यासमोर वसमत रोडवर अचानक नाकाबंदी लावली. यावेळी संशयितास ताब्यात घेऊन अंगझडती घेतली असता त्याच्याकडे एक स्टील बॉडीचे, प्लास्टिक मुठीचे व मॅगझिनसह गावठी बनावटीचे पिस्टल तसेच 7.65 एमएमची दोन जिवंत काडतुसे आढळून आली. आरोपी ज्या काळ्या रंगाच्या होंडा युनिकॉर्न मोटारसायकल क्रमांक MH 26 CM 4295 वरून प्रवास करत होता, ती गाडी देखील पोलिसांनी जप्त केली. जप्त केलेल्या पिस्टलची किंमत 25 हजार, काडतुसांची 1 हजार व मोटारसायकलची 40 हजार अशी एकूण 66 हजार रुपयांचा मुद्देमाल ताब्यात घेण्यात आला.

या (Hatta police action) प्रकरणी पोलीस ठाणे हट्टा येथे गु.र.क्र. 144/2026 कलम 3, 25 भारतीय हत्यार कायदा अन्वये गुन्हा दाखल करण्यात आला आहे. आरोपीने विनापरवाना बेकायदेशीररीत्या शस्त्र बाळगल्याचे निष्पन्न झाले असून लोकांमध्ये दहशत निर्माण करण्याच्या व चोरटी विक्री करण्याच्या उद्देशाने पिस्टल जवळ बाळगल्याचा प्राथमिक अंदाज आहे. रात्री 9 वाजून 21 मिनिटांनी आरोपीला अटक करण्यात आली असून गुन्ह्याचा पुढील तपास ग्रेड पोउपनि शेख करीत आहेत. जप्त केलेले पिस्टल आरोपीने कुठून आणले, त्याचा वापर कशासाठी करणार होता व यामागे एखादी टोळी कार्यरत आहे का, या दिशेने पोलीस तपास करत आहेत.

डॉ. निलाभ रोहन यांनी पदभार स्वीकारल्यापासून जिल्ह्यातील गुन्हेगारीवर वचक बसवण्यासाठी अवैध शस्त्रसाठा शोधून काढण्यावर भर दिला आहे. त्यांच्या सूचनेनंतर जिल्ह्यातील तेराही पोलीस ठाण्यांच्या पथकांनी नाकाबंदी, गुप्त माहितीच्या आधारे छापे आणि संशयितांची तपासणी वाढवली आहे. गेल्या काही महिन्यांतच अनेक ठिकाणी गावठी कट्टे व धारदार हत्यारे जप्त करून आरोपींवर गुन्हे दाखल करण्यात आले आहेत. चिखली पाटी येथील या कारवाईमुळे अवैध शस्त्र बाळगणाऱ्यांमध्ये पुन्हा एकदा खळबळ उडाली आहे.