हनुमान जयंतीच्या शोभायात्रेत बेपत्ता झालेल्या बालकाचा संशयास्पद मृत्यू

नागपूर (Nagpur Child Death) : हनुमान जयंतीच्या उत्सवाच्या वातावरणात नागपुरात एक खळबळजनक घटना घडली आहे. गिट्टी खदान हद्दीतून शोभायात्रेदरम्यान बेपत्ता झालेल्या अथर्व नानोरे वय १४ वर्षे  या बालकाचा मृतदेह आज भरतवाडा परिसरात संशयास्पद स्थितीत आढळल्याने संपूर्ण शहरात भीतीचे आणि संतापाचे वातावरण पसरले आहे. मिळालेल्या माहितीनुसार, अथर्व हनुमान जयंतीनिमित्त काढण्यात आलेल्या शोभायात्रेत सहभागी झाला होता, तिथूनच तो (Nagpur Child Death) बेपत्ता झाला होता. नातेवाईकांनी त्याचा शोध घेतला मात्र तो सापडला नाही.

अखेर आज भरतवाडा परिसरात एका बोरीमध्ये  त्याचा मृतदेह आढळून आला. मृतदेहाची अवस्था पाहून उपस्थितांच्या काळजाचा थरकाप उडाला.अथर्वची हत्या अत्यंत क्रूरपणे करण्यात आल्याचे प्राथमिक दर्शनी दिसून येत आहे. (Nagpur Child Death) अथर्वचे हात बांधलेले अवस्थेत होते. त्याच्या गळ्याला देखील आवळले होते. त्याची जीभ बाहेर आलेली असल्याने, त्याचा गळा दाबून किंवा आवळून खून करण्यात आला असावा, असा दाट संशय व्यक्त केला जात आहे.

एका निष्पाप मुलाची इतक्या टोकाच्या निर्दयतेने हत्या कोणी आणि का केली असावी? या प्रश्नाने पोलीस प्रशासनासमोर मोठे आव्हान उभे केले आहे. घटनास्थळी फॉरेन्सिक टीम आणि वरिष्ठ पोलीस अधिकाऱ्यांनी भेट दिली असून परिसरात लावण्यात आलेले सीसीटीव्ही फुटेज तपासण्याचे काम सुरू आहे. या (Nagpur Child Death) घटनेमुळे नानोरे कुटुंबावर दुःखाचा डोंगर कोसळला आहे. दरम्यान आजच अथर्व मिळावा, यासाठी चक्काजाम आंदोलन करण्यात आले होते.