Hingoli Livestock Theft: हिंगोलीमध्ये शेतकऱ्यांच्या पशुधनाची चोरी करणाऱ्या अंतरजिल्हा टोळीला स्थानिक पोलिसांनी अटक केली. यात ९ लाखांचा मुद्देमाल जप्त करण्यात आला.
स्थानिक गुन्हे शाखेच्या विशेष पथकाची धडक कारवाई
हिंगोली (Hingoli Livestock Theft) : जिल्ह्यात शेतकऱ्यांची जनावरे चोरी करणाऱ्या अंतरजिल्हा टोळीच्या मुसक्या स्थानिक गुन्हे शाखेच्या पथकाने आवळल्या आहेत. या कारवाईत दोन आरोपींना अटक करून ९ लाख ४ हजार रुपयांचा मुद्देमाल जप्त करण्यात आला आहे.
दि. ९ एप्रिल २०२६ रोजी पहाटे ७ वाजण्यापूर्वी यशवंत नगर, हिंगोली येथून तुलजाराम मदनलाल साहु यांच्या गायी अज्ञात चोरट्यांनी चोरून नेल्या. याप्रकरणी हिंगोली शहर पोलीस ठाण्यात गुरनं. २३०/२०२६ कलम ३०३(२), ३२५ भा.न्या.सं. अन्वये गुन्हा दाखल झाला होता. जिल्ह्यात जनावरे चोरीच्या वाढत्या घटनांमुळे पोलीस अधीक्षक डॉ. नीलाभ रोहन यांनी हा गुन्हा गांभीर्याने घेत तातडीने उघडकीस आणण्याचे आदेश दिले.
पोनि मोहन भोसले यांच्या मार्गदर्शनाखाली पोउपनि माधव जिव्हारे यांचे विशेष पथक नेमण्यात आले. गोपनीय माहितीच्या आधारे पथकाने सापळा रचून अलांम अनिस शेख, रा. अन्सारी चौक कल्याण, मुंबई, ह.मु. लेबर कॉलनी नांदेड आणि सय्यद समीर अहमद, रा. लेबर कॉलनी नांदेड यांना ताब्यात घेतले. चौकशीत दोघांनी गुन्ह्याची कबुली दिली. आरोपींनी हिंगोली शहर, कळमनुरी, सेनगाव व बाळापूर पोलीस ठाणे हद्दीत एकूण ५ गुन्हे केल्याचे निष्पन्न झाले. चोरी केलेली जनावरे विकून मिळालेले नगदी पैसे व गुन्ह्यात वापरलेली टोयोटा इनोव्हा कार असा एकूण ९,०४,००० रुपयांचा मुद्देमाल पोलिसांनी जप्त केला आहे.
ही (Hingoli Livestock Theft) यशस्वी कारवाई पोलीस अधीक्षक डॉ. नीलाभ रोहन, अपर पोलीस अधीक्षक कमलेश मिना यांच्या मार्गदर्शनाखाली स्थानिक गुन्हे शाखेचे पोलीस निरीक्षक मोहन भोसले, पोउपनि माधव जिव्हारे, पोलीस अंमलदार शेख शकील, सतीश जाधव, लिंबाजी वाव्हळे, किशोर सावंत, विशाल खंडागळे, आजम प्यारेवाले, शंकर हराळ यांनी केली. या कारवाईमुळे शेतकऱ्यांमध्ये समाधान व्यक्त होत आहे.