मोदी-मेलोनी व्हिडीओ व्हायरल; ‘मेलोडी’ टॉफीमुळे शेअर बाजारात गोंधळ

नवी दिल्ली (Melody Toffee) : पंतप्रधान नरेंद्र मोदी यांनी इटली दौऱ्यादरम्यान इटलीच्या पंतप्रधान जॉर्जिया मेलोनी यांना ‘Melody’ टॉफी भेट दिल्यानंतर सोशल मीडियावर पुन्हा एकदा “Melodi” ट्रेंड व्हायरल झाला. या व्हायरल क्षणाचा थेट परिणाम शेअर बाजारातही पाहायला मिळाला असून, मंगळवारी Parle Industries या कंपनीच्या शेअर्समध्ये मोठी तेजी दिसून आली.

Parle Industries चे शेअर्स दिवसभरात सुमारे ५ टक्क्यांनी वाढून ५.२५ रुपयांपर्यंत पोहोचले. गेल्या एका आठवड्यात या शेअरमध्ये जवळपास ७ टक्क्यांची वाढ नोंदवली गेली आहे.

पण खरी गोष्ट वेगळीच!

गुंतवणूकदारांमध्ये मात्र मोठा गोंधळ निर्माण झाला. कारण ‘Melody’ टॉफी बनवणारी कंपनी Parle Industries नसून, ती Parle Products ही प्रसिद्ध FMCG कंपनी आहे.

Parle Products हीच कंपनी Parle-G, Monaco, KrackJack, Mango Bite आणि Poppins यांसारखे लोकप्रिय ब्रँड तयार करते. मात्र ही कंपनी शेअर बाजारात सूचीबद्ध (Listed) नाही.

दुसरीकडे, Parle Industries ही बीएसईवर सूचीबद्ध असलेली स्वतंत्र कंपनी असून तिचा Melody टॉफीशी कोणताही थेट संबंध नाही.

शेअर्समध्ये अचानक तेजी का आली?

पंतप्रधान मोदी आणि जॉर्जिया मेलोनी यांचा एक हलकाफुलका व्हिडीओ सोशल मीडियावर व्हायरल झाल्यानंतर ही तेजी पाहायला मिळाली. त्या व्हिडीओमध्ये मोदी यांनी मेलोनी यांना Melody टॉफी भेट दिल्याचे दिसत होते. सोशल मीडियावर दोन्ही नेत्यांसाठी वापरल्या जाणाऱ्या “#Melodi” या ट्रेंडशी जोडून अनेकांनी हा क्षण मजेशीर पद्धतीने शेअर केला.

जॉर्जिया मेलोनी यांनीही हा व्हिडीओ X वर पोस्ट करत “Thank you for the gift” असे म्हटले. व्हिडीओमध्ये त्या “He gifted... a very, very good toffee,” असे म्हणताना ऐकू येतात. त्यानंतर दोन्ही नेते हसताना दिसतात.

हा व्हिडीओ व्हायरल होताच सोशल मीडियावर लाखो व्ह्यूज आणि प्रतिक्रिया उमटल्या. त्यानंतर Parle Industries च्या शेअर्समध्ये अचानक खरेदी वाढल्याचे दिसून आले.

सोशल मीडिया ट्रेंडचा शेअर बाजारावर प्रभाव

अलिकडच्या काळात सोशल मीडिया ट्रेंड, व्हायरल व्हिडीओ किंवा कंपनीच्या नावातील साधर्म्यामुळे काही शेअर्समध्ये अचानक चढ-उतार दिसून येत आहेत. विशेषतः कमी किमतीचे आणि स्मॉल-कॅप शेअर्स अशा ट्रेंडमुळे वेगाने वाढताना दिसतात.

मात्र, आजच्या तेजी असूनही Parle Industries चा दीर्घकालीन परफॉर्मन्स अजूनही दबावाखाली आहे.

• गेल्या ३ महिन्यांत शेअर सुमारे ४१% घसरला आहे

• ६ महिन्यांत जवळपास ४६% घसरण झाली आहे

• तर गेल्या एका वर्षात शेअर ६८% पेक्षा अधिक खाली आला आहे

या घटनेमुळे सोशल मीडिया आणि व्हायरल ट्रेंड्सचा शेअर बाजारातील व्यवहारांवर वाढता प्रभाव पुन्हा एकदा अधोरेखित झाला आहे.