भोपाळ (Lake Hideout) : रेल्वे सुरक्षा दलाने (RPF) अत्यंत नाट्यमय पद्धतीने कारवाई करत तलावात लपून बसलेल्या एका सराईत चोराला अटक केली आहे. विविध राज्यांत २१ हून अधिक गुन्ह्यांमध्ये वॉन्टेड असलेल्या या आरोपीचा पोलिसांकडून अनेक दिवसांपासून शोध सुरू होता. अखेर मध्य प्रदेशातील जबलपूर येथे त्याला पकडण्यात यश आले.
मिळालेल्या माहितीनुसार, उत्तर प्रदेशातील बिजनौर येथील रहिवासी असलेला हा आरोपी पहाटे सिहोरा रेल्वे स्थानकावर संशयास्पद हालचाली करताना RPF जवानांच्या नजरेस पडला. ट्रेन क्रमांक ११७५३ मधून उतरत असताना तो एका महिला प्रवाशाची पर्स चोरण्याचा प्रयत्न करत होता. ही बाब लक्षात येताच जवानांनी त्याचा पाठलाग सुरू केला.
पकड टाळण्यासाठी आरोपीने जवळच असलेल्या जलपर्णींनी भरलेल्या तलावात उडी मारली. अटकेपासून बचाव करण्यासाठी तो तब्बल पाच तास पाण्यातच लपून बसला होता. विशेष म्हणजे, श्वास घेण्यासाठी त्याने कमळाच्या देठाचा वापर केल्याची माहिती समोर आली आहे.
यानंतर RPFने स्थानिक पोलिसांची मदत घेत पाणबुड्यांना पाचारण केले. त्यांच्या मदतीने आरोपीला तलावातून बाहेर काढण्यात आले. बाहेर आल्यानंतरही त्याने पळून जाण्याचा प्रयत्न केला, मात्र जवानांनी कसून प्रयत्न करत त्याला अखेर जेरबंद केले.
प्राथमिक चौकशीत आरोपीने पोलिसांची दिशाभूल करण्याचा प्रयत्न केला. मात्र कठोर चौकशीनंतर त्याने गुन्ह्यांची कबुली दिली. हरविंदर सिंह (वय ३२) असे त्याचे नाव असून, विशेष म्हणजे तो २०१७ मध्ये निवडणूक जिंकून नगरसेवकही राहिला असल्याचे उघड झाले आहे.
पोलिसांच्या माहितीनुसार, आरोपीविरोधात मध्य प्रदेशसह इतर राज्यांमध्ये २१ पेक्षा अधिक गुन्हे दाखल आहेत. अनेक प्रकरणांमध्ये तो फरार होता. अटकेनंतर त्याला न्यायालयात हजर करण्यात आले असून न्यायालयाने त्याला पोलीस कोठडी सुनावली आहे.
