नेर तालुक्यात अवकाळी पाऊस व वादळी वाऱ्याने पुन्हा एकदा नागरिकांचे मोठे नुकसान केले.
नेर (Unseasonal Rain Damage) : नेर तालुक्यात अवकाळी पाऊस व वादळी वाऱ्याने पुन्हा एकदा नागरिकांचे मोठे नुकसान केले असून शिंदखेड येथील एका गरीब मेंढपाळ कुटुंबावर नैसर्गिक आपत्तीचे संकट कोसळले आहे. गुरुवारी सायंकाळी अचानक आलेल्या वादळी वाऱ्यासह पावसामुळे वैभव शिंदे यांच्या घरावरील टिन पत्रे उडून गेली तर घराची भिंतही कोसळली. या घटनेत अंदाजे २५ हजार रुपयांचे नुकसान झाल्याचा प्राथमिक अंदाज व्यक्त करण्यात आला आहे.
वैभव शिंदे हे शिंदखेड येथील रहिवासी असून ते मेंढपाळ व्यवसाय करून आपल्या कुटुंबाचा उदरनिर्वाह करतात. आधीच आर्थिक परिस्थिती हलाखीची असताना अवकाळी पावसामुळे त्यांच्या कुटुंबासमोर मोठे संकट उभे ठाकले आहे. घराचे मोठे नुकसान झाल्याने कुटुंब उघड्यावर येण्याची वेळ आली असून नागरिकांनीही प्रशासनाने तातडीने मदत करावी अशी मागणी केली आहे.
दरम्यान, शिंदखेड येथील सामाजिक कार्यकर्ते मिलन राठोड यांनी प्रशासनाकडे पंचनामा करून नुकसानग्रस्त कुटुंबाला त्वरित आर्थिक मदत देण्याची मागणी केली आहे. “गरीब मेंढपाळ कुटुंबाचे मोठे नुकसान झाले असून शासनाने तातडीने मदतीचा हात पुढे करावा,” असे त्यांनी सांगितले.
तसेच प्रशासनाने तत्काळ सर्वेक्षण करून मदत जाहीर करावी, अशी मागणी नागरिकांकडून होत आहे.