नवनियुक्त विभागीय आयुक्त जी. श्रीकांत यांचे महसूल कर्मचारी संघटनेतर्फे स्वागत

संघटनेचे कार्याध्यक्ष लक्ष्मण नरमवार यांनी दिल्या आयुक्ताना शुभेच्छा

नांदेड (Revenue Department) : छत्रपती संभाजीनगर विभागाच्या महसूल आयुक्तपदी नियुक्ती झाल्यानंतर आयएएस अधिकारी जी. श्रीकांत यांनी नुकताच आपला पदभार स्वीकारला. या नियुक्तीबद्दल महसूल कर्मचारी संघटनेचे राज्य कार्याध्यक्ष लक्ष्मण नरमवार आणि नांदेड जिल्हा महसूल कर्मचारी संघटनेच्या वतीने १८ एप्रिल रोजी त्यांची सदिच्छा भेट घेऊन जंगी स्वागत करण्यात आले.

शनिवारी सकाळी आयुक्तांच्या निवासस्थानी भेट घेऊन त्यांचे पुष्पगुच्छ देऊन अभिनंदन करण्यात आले. या प्रसंगी बोलताना लक्ष्मण नरमवार यांनी विश्वास व्यक्त केला की, जी. श्रीकांत यांच्या नेतृत्वाखाली विभागाला सक्षम, पारदर्शक आणि परिणामकारक प्रशासनाची एक नवी दिशा मिळेल. आपल्या कार्यपद्धतीतून अधिकारी आणि कर्मचारी यांच्यात सुसंवाद साधण्याला ते प्राधान्य देत असल्याचे यावेळी अधोरेखित करण्यात आले.

कर्मचाऱ्यांच्या समस्या केवळ ऐकून न घेता, त्या सोडवण्यासाठी विशेष शिबिरे आणि मोहीम राबवण्याचे आश्वासन आयुक्त जी. श्रीकांत यांनी यावेळी दिले. त्यांच्या या संवेदनशील आणि कार्यक्षम नेतृत्वामुळे महसूल विभाग अधिक बळकट होईल आणि कर्मचाऱ्यांमध्ये नवचैतन्य निर्माण होईल, अशा भावना महसूल कर्मचारी संघटनेच्या वतीने व्यक्त करण्यात आल्या आहेत.या स्वागत सोहळ्याला राज्य कार्याध्यक्ष लक्ष्मण नरमवार,धोड नामदेव, शंकर मगडेवार, धोगडे नांदेड जिल्हा महसूल कर्मचारी संघटनेचे पदाधिकारी आणि कर्मचारी मोठ्या संख्येने उपस्थित होते.

महत्त्वाच्या प्रश्नांवर सकारात्मक चर्चा

या भेटीदरम्यान कर्मचारी आणि अधिकाऱ्यांच्या विविध अडचणींवर सविस्तर चर्चा करण्यात आली. यात प्रामुख्याने विभागीय चौकशी, पदोन्नती, ज्येष्ठता यादी, कार्यालयीन विनंत्या आणि बदल्या यांसारख्या प्रलंबित विषयांवर आयुक्तांनी सकारात्मक दृष्टिकोन दाखवल्याने कर्मचारी वर्गात आनंदाचे वातावरण आहे.