वर्ली परिसरात मंगळवारी झालेल्या राजकीय मोर्चामुळे प्रचंड वाहतूक कोंडी निर्माण झाली.
मुंबई (Political Rally Chaos) : वर्ली परिसरात मंगळवारी झालेल्या राजकीय मोर्चामुळे प्रचंड वाहतूक कोंडी निर्माण झाली आणि त्यात अडकलेल्या एका महिला प्रवाशाने संताप व्यक्त करत थेट राज्याचे मंत्री गिरीश महाजन आणि पोलिस अधिकाऱ्यांना जाब विचारल्याची घटना समोर आली आहे. हा मोर्चा सत्ताधारी भारतीय जनता पक्षाने (भाजप) महायुतीच्या वतीने आयोजित केला होता.
सदर महिला आपल्या मुलाला शाळेतून आणण्यासाठी जात असताना तासन्तास ट्रॅफिकमध्ये अडकली होती. अखेर संताप अनावर झाल्याने ती वाहनातून उतरली आणि मोर्चाच्या मध्यभागी जाऊन मंत्री गिरीश महाजन यांच्याशी तीव्र शब्दांत वाद घातला.
“इथून निघा, तुम्ही ट्रॅफिक जाम करत आहात,” असे ती संतप्तपणे म्हणाली. मोर्चा रस्त्यावर न काढता जवळच्या मोकळ्या मैदानात का घेतला नाही, असा सवालही तिने केला.
महाजन यांनी तिला शांत करण्याचा प्रयत्न केला असता, ती आणखी आक्रमक झाली. “समजत नाही का? काय प्रॉब्लेम आहे? शेकडो लोक अडकले आहेत,” असे म्हणत तिने संताप व्यक्त केला. जवळच असलेल्या मोकळ्या जागेकडे बोट दाखवत, “इथे मैदान आहे ना,” असेही ती म्हणाली.
या दरम्यान तिने मुंबई पोलिसांनाही धारेवर धरले. पोलिसांनी हस्तक्षेप करण्याचा प्रयत्न केल्यावर तिने वरिष्ठ अधिकाऱ्यांशीच बोलण्याचा आग्रह धरला आणि इतरांशी संवाद साधण्यास नकार दिला.
यानंतर पोलिसांनी तिला रस्त्याच्या कडेला नेऊन तिचे म्हणणे ऐकून घेण्याचा प्रयत्न केला.
ही संपूर्ण घटना कॅमेऱ्यात कैद झाली असून, त्याचा व्हिडिओ सोशल मीडियावर वेगाने व्हायरल झाला आहे. या प्रकारावरून भाजपच्या आंदोलनावर टीका होत आहे.
दरम्यान, हा मोर्चा विरोधी महाविकास आघाडी (एमव्हीए) – काँग्रेस व त्यांच्या सहयोगींविरोधात काढण्यात आला होता. लोकसभेत महिलांसाठी ३३ टक्के आरक्षण देणाऱ्या विधेयकाला बहुमत न मिळाल्याच्या पार्श्वभूमीवर हा निषेध मोर्चा आयोजित करण्यात आला होता.
महाराष्ट्र काँग्रेसचे प्रदेशाध्यक्ष हर्षवर्धन सपकाळ यांनी हा व्हिडिओ शेअर करत सत्ताधाऱ्यांच्या महिला आरक्षणावरील भूमिकेवर टीका केली असून, यामुळे त्यांचा “खरा चेहरा” समोर आल्याचा आरोप केला आहे.
“आमचा मोर्चा महिलांसाठीच होता” – गिरीष महाजन
घडलेल्या घटनेनंतर मंत्री गिरीष महाजन यांनी माध्यमांशी संवाद साधत आपली भूमिका स्पष्ट केली. त्यांनी सांगितले की, हा मोर्चा पूर्णपणे महिलांच्या आरक्षणाच्या मुद्द्यावर आधारित होता आणि महिलांच्या हक्कांसाठीच आयोजित करण्यात आला होता.
त्या महिलेच्या संतापाबाबत बोलताना महाजन म्हणाले, “त्या महिलेचा राग खूपच तीव्र होता, त्यामुळे त्यांनी तीव्र शब्दांत प्रतिक्रिया दिली. मात्र, अशा प्रकारच्या घटनांपासून पुढील काळात आम्ही नक्कीच सावधगिरी बाळगू.”
ते पुढे म्हणाले की, “मोर्चा किंवा आंदोलन असताना अशा प्रकारच्या घटना अधूनमधून घडत असतात, याची सर्वांना जाणीव आहे. मात्र संबंधित महिलेने वापरलेली भाषा संसदीय नव्हती. त्यांना आपला मुद्दा मांडायचा होता, तो अधिक संयमित पद्धतीने मांडता आला असता. तसेच, त्यांनी पोलिसांकडे औपचारिक तक्रारही करू शकल्या असत्या. आमच्या मोर्चासाठी आम्ही पोलिसांची अधिकृत परवानगी घेतली होती.”
“नियोजन चुकले नाही”
भाजपच्या नियोजनावर प्रश्न उपस्थित झाल्यानंतर महाजन यांनी स्पष्ट केले की, “हो, काही नागरिकांना त्रास झाला हे आम्ही मान्य करतो; पण प्रत्येक मोर्चात अशी परिस्थिती निर्माण होऊ शकते. आमचा मोर्चा सायंकाळी साडेपाच वाजता ठरलेला होता आणि त्याचा मार्गही निश्चित होता. सर्व परवानग्या घेतल्यानंतरच तो काढण्यात आला होता. त्यामुळे आमच्या नियोजनात कुठलीही त्रुटी नव्हती.”
महाजन यांनी पुढे सांगितले की, “आमच्या भगिनींनी अशा प्रकारे आक्रमक वर्तन करणे, वस्तू फेकणे हे योग्य नाही. हा मोर्चा महिलांच्या प्रश्नांसाठीच होता, हे लक्षात घेणे गरजेचे आहे.”