Social Equality Week: नांदेडमध्ये सामाजिक समता सप्ताहाच्या निमित्ताने ज्येष्ठ नागरिकांसाठी विशेष आरोग्य तपासणी शिबिर व माहिती सत्र आयोजित करण्यात आले.
नांदेड (Social Equality Week) : भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त सामाजिक न्याय विभागामार्फत ८ एप्रिल ते १४ एप्रिल २०२६ या कालावधीत 'सामाजिक समता सप्ताह' राबविण्यात येत आहे. या सप्ताहाचे औचित्य साधून सोमवार, १३ एप्रिल २०२६ रोजी सकाळी ११:०० वाजता मालेगाव रोडवरील 'संध्या छाया' संचलित रुस्तुमजी मेवालाल वृद्धाश्रमात ज्येष्ठ नागरिक जनजागृती मेळावा व आरोग्य तपासणी शिबिर उत्साहात पार पडले. मान्यवरांची उपस्थिती आणि सन्मान कार्यक्रमाच्या अध्यक्षस्थानी डॉ. पी.डी. जोशी पाटोदेकर होते, तर प्रमुख पाहुण्या म्हणून वृद्धाश्रमाच्या सचिव सुरेखा पाटणे मॅडम उपस्थित होत्या. समाज कल्याण विभागाचे श्री. विठ्ठल बोराटे (वरिष्ठ लिपीक), कपिल जेटलावार (कनिष्ठ लिपीक), गजानन पाम्पटवार (तालुका समन्वयक), विजय माळवतकर (तालुका समन्वयक) आणि प्रमोद गायकवाड यांची प्रमुख उपस्थिती होती.
मान्यवरांचे स्वागत समाज कल्याण विभागाच्या वतीने 'संविधान प्रास्ताविक उद्देशिका' प्रतिमा देऊन करण्यात आले. तज्ज्ञ डॉक्टरांकडून आरोग्य तपासणी या शिबिरात ज्येष्ठ नागरिकांच्या आरोग्याची विशेष काळजी घेण्यात आली. यामध्ये डॉ. सुप्रिया गोडघासे (स्त्रीरोग तज्ञ), डॉ. अनिकेत जोशी (त्वचारोग तज्ञ) आणि डॉ. अश्विन लव्हेकर (कान, नाक, घसा तज्ञ) यांनी उपस्थित राहून वृद्धाश्रमातील वृद्धांची सखोल आरोग्य तपासणी केली व आवश्यक वैद्यकीय सल्ला दिला. मार्गदर्शन आणि योजनांची माहिती कार्यक्रमाचे प्रास्ताविक गजानन पाम्पटवार यांनी केले, ज्यामध्ये त्यांनी ज्येष्ठ नागरिकांसाठी शासनाच्या व समाज कल्याण विभागाच्या विविध कल्याणकारी योजनांची माहिती दिली.
सचिव सुरेखा पाटणे यांनी वृद्धाश्रमातील सोयी-सुविधा आणि वृद्धांच्या दिनचर्येबाबत उपस्थितांना अवगत केले. विठ्ठल बोराटे यांनी उपस्थितांना मार्गदर्शन केले, तर अध्यक्ष डॉ. पी.डी. जोशी पाटोदेकर यांनी आपल्या भाषणातून ज्येष्ठ नागरिकांच्या सामाजिक भूमिकेवर प्रकाश टाकला. कार्यक्रमाचे सूत्रसंचालन प्रदीप फटाले यांनी केले, तर आभार प्रदर्शन डॉ. सुप्रिया गोडघासे यांनी मानले. शहरात स्वच्छता मोहीम समता सप्ताहाचे औचित्य साधून शहरात विविध ठिकाणी स्वच्छता मोहीमही राबवण्यात आली.
यामध्ये डॉ. बाबासाहेब आंबेडकर पुर्णाकृती पुतळा परिसर, अण्णाभाऊ साठे पुतळा, राजर्षी शाहू महाराज पुतळा, महात्मा फुले व सावित्रीबाई फुले पुतळा परिसर, छत्रपती शिवाजी महाराज पुतळा परिसर तसेच प्रमुख रस्ते, मस्जिद परिसर आणि बौद्ध विहार या ठिकाणी स्वच्छता करण्यात आली. या मोहिमेत समतादूत दिलीप सोंडारे, शेख ईर्शाद तसेच कार्यालयातील कर्मचारी विठ्ठल बोराटे, कपिल जेटलावार, श्रीमती एस.के. काळे, रहिम शेख, गणेश माळवदकर व गजानन पांपटवार यांनी सक्रिय सहभाग नोंदविला. सदर सर्व उपक्रम समाज कल्याण नांदेडचे सहाय्यक आयुक्त शिवानंद मीनगिरे यांच्या मार्गदर्शनाखाली यशस्वीरित्या पूर्ण करण्यात आले.