खापरखेडा मध्ये रुग्णाला औषध पोहोचवून परतणाऱ्या तरुण फार्मसी चालकाचा अपघातात मृत्यू

खापरखेडा (Nagpur Accident) : रुग्णाला तातडीने औषध पोहोचवून नागपूरहून परतत असताना दहेगाव रंगारीजवळ झालेल्या भीषण अपघातात वलनी वस्ती (ता. सावनेर) येथील निखिल संजय चकोले (वय 29) या तरुण फार्मसी चालकाचा मृत्यू झाला. ही घटना रविवारी मध्यरात्री नागपूर-सावनेर मार्गावरील सनराईज हॉटेलसमोर घडली.

निखिल चकोले यांचे दाभा, नागपूर येथे ‘न्यू लाईफ केअर’ नावाचे मेडिकल स्टोअर होते. रविवारी सुट्टीमुळे ते दिवसभर घरी होते. दरम्यान, एका रुग्णाला तातडीने औषध पोहोचवण्यासाठी त्यांना नागपूरला जावे लागले. रात्री काम पूर्ण करून ते आपल्या चारचाकी वाहनाने (एमएच-40/सीएच-4765) सावनेरकडे परतत होते.

प्राथमिक माहितीनुसार, दहेगाव रंगारी परिसरातील सनराईज हॉटेलसमोर त्यांच्या वाहनावरील नियंत्रण सुटले. वाहन प्रथम रस्त्याच्या मधोमध असलेल्या डिव्हायडरला धडकले. त्यानंतर वाहन डिव्हायडर ओलांडून विरुद्ध दिशेला गेले व समोरून येणाऱ्या ट्रक (सीजी-07/बीझेड-8893) ला धडकले. या अपघातात निखिल गंभीर जखमी झाले.

घटनेची माहिती मिळताच मित्रांनी व पोलिसांनी त्यांना तातडीने मॅक्स हॉस्पिटल, नागपूर येथे दाखल केले. मात्र डॉक्टरांनी तपासणीअंती मृत घोषित केले.

निखिल यांनी वर्षभरापूर्वीच स्वतःची फार्मसी सुरू केली होती. त्यांच्या पश्चात आई-वडील, विवाहित बहीण असा परिवार आहे. त्यांच्या अकाली निधनाने वलनी परिसरात हळहळ व्यक्त होत आहे.

या प्रकरणी खापरखेडा पोलीस ठाण्यात भारतीय न्याय संहिता कलम 281, 106(1) तसेच मोटार वाहन अधिनियम कलम 184 अन्वये नोंद करण्यात आली असून पुढील तपास हेड कॉन्स्टेबल संदीप सगणे करीत आहेत.