नगरपालिकेच्या मुख्याधिकाऱ्यालाच त्यांच्या दालनात घुसून मारहाण करण्याचा प्रयत्न आणि जीवे मारण्याची धमकी देण्यात आल्याची धक्कादायक घटना बीड येथे उघडकीस आली आहे.
बीड (Municipal Office Attack) : नगरपालिकेच्या मुख्याधिकाऱ्यालाच त्यांच्या दालनात घुसून मारहाण करण्याचा प्रयत्न आणि जीवे मारण्याची धमकी देण्यात आल्याची धक्कादायक घटना बीड येथे उघडकीस आली आहे. मुख्याधिकारी शैलेश फडसे यांच्याशी संबंधित हा प्रकार असून, यामुळे पालिका वर्तुळात एकच खळबळ उडाली आहे. घटनेचे सीसीटीव्ही फुटेजही समोर आले आहे.
मिळालेल्या माहितीनुसार, मुख्याधिकारी फडसे हे आपल्या दालनात नियमित कामकाज करत असताना एक व्यक्ती तेथे आली. पीटीआरवर नाव नोंदणी करण्याच्या कारणावरून या व्यक्तीने सुरुवातीला दबाव टाकण्याचा प्रयत्न केला. चर्चा सुरू असतानाच त्याने अरेरावी करत शिवीगाळ केली आणि थेट जीवे मारण्याची धमकी दिली. काही क्षणांतच परिस्थिती चिघळली.
कार्यालयातील कर्मचाऱ्यांनी प्रसंगावधान राखत तत्काळ हस्तक्षेप केला आणि संबंधित व्यक्तीला अडवले. त्यामुळे मोठा अनर्थ टळला. हा संपूर्ण प्रकार कार्यालयातील सीसीटीव्ही कॅमेऱ्यात कैद झाला असून, त्यावरून घटनेची गंभीरता स्पष्ट होत आहे.
या घटनेनंतर पालिका कर्मचाऱ्यांमध्ये संतापाची भावना निर्माण झाली. वरिष्ठ अधिकाऱ्याला अशा प्रकारे धमकावण्यात आल्याचा निषेध करत कर्मचाऱ्यांनी पालिकेसमोर ठिय्या आंदोलन छेडले. दोषी व्यक्तीवर तात्काळ गुन्हा दाखल करून कठोर कारवाई करावी, अशी मागणी करण्यात आली.
दरम्यान, या प्रकरणी पोलीस अधीक्षक शीतलकुमार बल्लाळ यांनी मुख्याधिकाऱ्यांचे पत्र प्राप्त झाल्याचे सांगत, तक्रार दाखल होताच कठोर कारवाई केली जाईल, असे स्पष्ट केले. त्यानंतर कर्मचाऱ्यांनी आंदोलन मागे घेतले. या घटनेमुळे सरकारी कार्यालयातील सुरक्षा व्यवस्थेवरही प्रश्नचिन्ह निर्माण झाले आहे.