High Car Accident: सेनगावमध्ये एका मद्यधुंद चालकाने अपघातानंतर मदत करणाऱ्या कामगारांवर दगडफेक आणि मारहाण केली. परिस्थिती तणावपूर्ण बनली असून पोलिस चौकशी सुरू आहे.
मदतीला धावलेल्या कर्मचाऱ्यांनाच दगडाने मारहाण, हायवा गाडीची काच फोडली
सेनगाव (High Car Accident) : हत्ता ते साखरा मार्गावरील ऊटी ब्रम्हचारी गावाजवळ मंगळवारी दि. २८ एप्रिल रोजी सायंकाळी पावणे पाचच्या सुमारास भरधाव वेगातील कार थेट पलटी झाल्याची घटना घडली. सुदैवाने या अपघातात कोणतीही जीवितहानी झाली नाही. मात्र अपघातानंतर मदतीला धावलेल्या रस्ते कामगारांवरच मद्यधुंद चालकाने दगडफेक व मारहाण केल्याने परिसरात काही काळ तणावाचे वातावरण निर्माण झाले होते.
मिळालेल्या माहितीनुसार, पाटोदा येथून भरधाव वेगाने येणारी कार ऊटी ब्रम्हचारी गावाजवळ नियंत्रण सुटल्याने रस्त्याच्या कडेला पलटी झाली. कारमध्ये चालकासह आणखी एक जण प्रवास करत होता. दोघेही मद्यप्राशन केलेल्या अवस्थेत असल्याची माहिती प्रत्यक्षदर्शींनी दिली. (High Car Accident) अपघाताची माहिती मिळताच हत्ता-तळणी रस्त्याचे काम करणाऱ्या कंपनीचे सुपरवायझर, इंजिनियर व मजूर मदतीसाठी घटनास्थळी धावले. त्यांनी कारमधील व्यक्तींना बाहेर काढण्याचा प्रयत्न केला. मात्र मदत करणाऱ्यांवरच चालकाने संताप व्यक्त करत दगडाने हल्ला केल्याचे सांगण्यात येत आहे.
यावेळी रस्ते कामात वापरल्या जाणाऱ्या कंपनीच्या हायवा वाहनाची काच दगडफेकीत फुटली. तसेच जिओ कंपनीच्या साईटवर काम करणाऱ्या सुपरवायझरलाही मारहाण झाल्याची माहिती समोर आली आहे. अचानक घडलेल्या या (High Car Accident) प्रकारामुळे कामगार व नागरिकांमध्ये घबराट पसरली होती. दरम्यान, हत्ता-तळणी मार्गावर सध्या रस्त्याचे काम सुरू असल्याने वाहनचालकांनी वेगावर नियंत्रण ठेवण्याची आवश्यकता व्यक्त केली जात आहे. सायंकाळी संबंधित रस्ता निर्मिती कंपनीचे कामगार सेनगाव पोलिस ठाण्यात दाखल झाले असून, पोलिसांकडून या संपूर्ण प्रकाराची चौकशी सुरू असल्याची माहिती प्राप्त झाली आहे.