खामगावात खून प्रकरणातील आरोपींची धिंड; घटनास्थळी प्रात्यक्षिक देत उलगडला घटनाक्रम

खामगाव (Khamgaon Crime) : २५ एप्रिल रोजी रात्री १०.३० वाजताच्या सुमारास खामगाव शहरातील बर्डे प्लॉट परिसरात लग्नात नाचण्याच्या कारणावरून झालेल्या वादातून २२ वर्षीय तरुणाची धारदार शस्त्रांनी व दगडाने मारहाण करून निर्घृण हत्या करण्यात आली होती. या गंभीर खून प्रकरणाच्या तपासाला वेग देत पोलिसांनी आज आरोपींना घटनास्थळी नेऊन महत्त्वपूर्ण तपास प्रक्रिया पार पाडली.

या वेळी पोलिसांनी आरोपींकडून प्रत्यक्ष घटनाक्रम समजून घेतला. आरोपींनी गुन्हा कसा केला, कोणत्या ठिकाणी काय घडले आणि घटनाक्रम कसा घडत गेला, याचे सविस्तर प्रात्यक्षिक घटनास्थळी करून दाखवले. या पुनर्रचनेतून तपास अधिक स्पष्ट करण्यास मदत झाल्याचे पोलिसांकडून सांगण्यात आले आहे.

दरम्यान, आरोपींना घटनास्थळी आणल्याची माहिती परिसरात पसरताच बर्डे प्लॉट परिसरात नागरिकांची मोठी गर्दी झाली. आरोपींना पाहण्यासाठी स्थानिक नागरिकांमध्ये उत्सुकता आणि कुतूहलाचे वातावरण निर्माण झाले होते. परिस्थिती नियंत्रणात ठेवण्यासाठी पोलिसांनी कडेकोट बंदोबस्त तैनात करत संपूर्ण प्रक्रिया सुरळीत पार पाडली.

या घटनास्थळ प्रात्यक्षिक तपासामुळे खून प्रकरणातील अनेक महत्त्वाचे पैलू स्पष्ट होण्यास मदत होणार असून, तपासाला अधिक गती मिळण्याची शक्यता व्यक्त केली जात आहे. पोलिसांकडून पुढील चौकशी सुरू असून, लवकरच अधिक तपशील समोर येण्याची अपेक्षा आहे.