कारंजा (घाडगे) बसस्थानकात खासगी वाहनांचा वाढता वावर आता चिंतेचा विषय ठरत असून, बसस्थानक परिसर थेट खासगी बस चालकांचे ‘अनधिकृत पार्किंग झोन’ बनल्याचे धक्कादायक चित्र समोर आले आहे.
कारंजा घाडगे (Illegal Parking) : महाराष्ट्र राज्य मार्ग परिवहन महामंडळच्या वर्धा जिल्ह्यातील कारंजा (घाडगे) बसस्थानकात खासगी वाहनांचा वाढता वावर आता चिंतेचा विषय ठरत असून, बसस्थानक परिसर थेट खासगी बस चालकांचे ‘अनधिकृत पार्किंग झोन’ बनल्याचे धक्कादायक चित्र समोर आले आहे. नियमांनुसार केवळ एसटी बसेसना बसस्थानक परिसरात प्रवेश आणि मुक्कामाची परवानगी असताना, रात्रीच्या वेळी खासगी बसेस फलाटासमोरच उभ्या राहत असल्याने प्रशासनाच्या निष्क्रियतेवर प्रश्नचिन्ह उपस्थित होत आहे.
नुकत्याच समोर आलेल्या एका छायाचित्रात पांढऱ्या रंगाची खासगी आयशर बस थेट एसटी फलाटासमोर उभी असल्याचे स्पष्ट दिसून येत आहे. त्यामुळे बसस्थानकातील वाहतूक व्यवस्था विस्कळीत होत असून, एसटी चालकांना बसेस फलाटावर लावताना मोठ्या अडचणींचा सामना करावा लागत आहे. विशेष म्हणजे, रात्रीच्या वेळी प्रवाशांची ये-जा सुरू असताना अशा प्रकारे खासगी वाहनांची वर्दळ वाढल्याने अपघाताचा धोका निर्माण झाला आहे.
स्थानिक नागरिकांनी या प्रकाराबाबत संताप व्यक्त करत प्रशासनाच्या भूमिकेवर तीव्र नाराजी व्यक्त केली आहे. बसस्थानकात सुरक्षा रक्षक आणि अधिकारी असतानाही खासगी बसेस बिनदिक्कतपणे आत कशा येतात, असा सवाल आता उपस्थित केला जात आहे. हा प्रकार केवळ निष्काळजीपणाचा परिणाम आहे की यामागे काही ‘आर्थिक हितसंबंध’ दडले आहेत, याबाबतही चर्चा रंगू लागली आहे.
दरम्यान, एसटी प्रशासनाने या गंभीर प्रकाराकडे दुर्लक्ष केल्यास भविष्यात मोठी दुर्घटना घडण्याची भीती व्यक्त होत आहे. वरिष्ठ अधिकाऱ्यांनी या प्रकरणाची तातडीने चौकशी करून दोषींवर कठोर कारवाई करावी आणि busस्थानक परिसर खासगी वाहनांच्या अतिक्रमणातून मुक्त करावा, अशी मागणी आता जोर धरू लागली आहे.
“एसटी फलाटावर खासगी बस उभी राहतेच कशी?”
हा प्रश्न आता सर्वसामान्य प्रवाशांपासून ते स्थानिक नागरिकांपर्यंत प्रत्येकाच्या तोंडी असून, कारंजा डेपोतील शिस्त आणि प्रशासनाची कार्यपद्धती पुन्हा एकदा वादाच्या भोवऱ्यात सापडली आहे.