परभणीत अवैध देशी दारू वाहतूक प्रकरणी दोघांविरुद्ध गुन्हा दाखल

एसपी पथकाची कारवाई; कारसह साडेचार लाखांचा मुद्देमाल जप्त

परभणी (Illegal Liquor) : स्थानिक गुन्हे शाखेला मिळालेल्या गुप्त माहितीनुसार पाथरी रोडवरील इंदेवाडी फाटा येथे सापळा रचून करण्यात आलेल्या कारवाईत देशी दारूची अवैध वाहतूक करणाऱ्या एका कारसह एकूण ४ लाख ४६ हजार रुपयांचा मुद्देमाल जप्त करण्यात आला. ही कारवाई शनिवार, १६ मे रोजी रात्री करण्यात आली.

पोलीस अधीक्षक कार्यालयाच्या विशेष पथकाला माहिती मिळाली होती की, एमएच ०४ ईएच ६७७८ क्रमांकाच्या स्विफ्ट डिझायर कारमधून अवैध देशी दारूची वाहतूक केली जात आहे. त्यानुसार पथकाने इंदेवाडी फाटा परिसरात सापळा रचत संबंधित वाहन अडविले.

वाहनाची तपासणी केली असता त्यामध्ये मोठ्या प्रमाणावर देशी दारूचा साठा आढळून आला. या कारवाईत ३ लाख ५० हजार रुपये किंमतीची स्विफ्ट डिझायर कार तसेच ९६ हजार रुपये किमतीची देशी दारू जप्त करण्यात आली. यामध्ये २५ सिल्व्हर बॉक्स तसेच प्रत्येकी १८० मिली क्षमतेच्या बाटल्यांचा समावेश असल्याचे पोलिसांनी सांगितले.

या प्रकरणी मंडला वसंत कुमार (रा. कोटमवाडी, ता. जि. परभणी) व गधा गोनी परसुराम गौड (रा. सिध्दीपेठ, हैदराबाद; हमु. पोखर्णी) यांच्याविरुद्ध महाराष्ट्र दारूबंदी कायद्यान्वये दैठणा पोलीस ठाण्यात गुन्हा दाखल करण्यात आला आहे. पुढील तपास दैठणा पोलीस करत आहेत.

ही कारवाई पोलीस अधीक्षक पंकज कुमावत यांच्या मार्गदर्शनाखाली पोउपनि टर्फे, पोह कुकडे, पोह सय्यद इर्शाद, पोह ताटी कोंडलवार, पोह वाघमारे, पोह चुडवाकर, पोशी शेख, पोशी लिंबाजी वाव्हळे यांच्या पथकाने केली.