'Police Kaka-Didi' initiative: हिंगोली पोलीस विभागाने महिला व बालकांच्या सुरक्षेसाठी 'पोलीस काका-दीदी' उपक्रम सुरू केला. या अंतर्गत प्रत्येक पोलीस स्टेशनमध्ये विशेष पथके तैनात करण्यात आली आहेत.
प्रत्येक पोलीस ठाण्यात विशेष पथके तैनात
हिंगोली ('Police Kaka-Didi' initiative) : पोलीस महासंचालक कार्यालयाच्या सूचनेनुसार हिंगोली पोलीस अधीक्षक कार्यालयात महिला व बालकांच्या सुरक्षा संदर्भात कार्यशाळा संपन्न झाली. पोलीस अधीक्षक डॉ. नीलाभ रोहन यांच्या अध्यक्षतेखाली झालेल्या या कार्यशाळेत 'पोलीस काका', 'पोलीस दीदी', 'विशेष पोलीस बाल पथक' व 'बडी कॉप' या उपक्रमांबाबत कायदेशीर तरतुदी व पोलिसांच्या भूमिकेवर सखोल मार्गदर्शन करण्यात आले.
दिशा संस्था, अमरावतीचे संस्थापक प्रविण खांडपासळे प्रमुख वक्ते म्हणून उपस्थित होते. या उपक्रमांतर्गत जिल्ह्यातील प्रत्येक पोलीस स्टेशनमध्ये आता 'पोलीस काका', 'पोलीस दीदी', विशेष बाल पथक व बडी कॉपची पथके नेमण्यात आली आहेत. ही पथके शाळा, हॉस्टेल, महिला कामाच्या ठिकाणी नियमित भेट देऊन तक्रारी जाणून घेणार आहेत.
महिला व बालकांच्या ('Police Kaka-Didi' initiative) तक्रारींसाठी या ठिकाणी 'संवाद पेटी' म्हणजेच तक्रार पेटी ठेवली जाणार आहे. विद्यार्थी व बालकांनी आपल्या तक्रारी या पेटीत टाकाव्यात, असे आवाहन पोलिसांनी केले आहे. तसेच रात्री कामावरून घरी जाणाऱ्या महिलांना असुरक्षित वाटल्यास तात्काळ डायल ११२ वर किंवा जवळच्या पोलिसांशी संपर्क साधावा. पोलीस त्यांना सुरक्षित घरी पोहोचवतील, अशी ग्वाही देण्यात आली. या कार्यशाळेस प्र. पोलीस उपअधीक्षक दत्ता केंद्रे, पोनि मोहन भोसले, सपोनि प्रेमलता जगताप तसेच सर्व ठाणेदार, शाखा प्रमुख व पोलीस अंमलदार उपस्थित होते.