पुण्यात आंदेकर गँगवॉर पुन्हा भडकला; वनराज आंदेकर हत्या प्रकरणातील आरोपीच्या भावाची भरदिवसा हत्या

पुणे (Gang War) : शहरातील कुख्यात आंदेकर गँगवॉरने पुन्हा एकदा रक्तरंजित वळण घेतले असून, वनराज आंदेकर हत्या प्रकरणातील आरोपीचा भाऊ अक्षय उर्फ बाळा म्हस्के याची मंगळवारी (२० मे) भरदिवसा निर्घृण हत्या करण्यात आली. धक्कादायक बाब म्हणजे धानकवडी परिसरातील बालाजीनगर बसस्टॉपवर ही थरारक घटना घडली.

मिळालेल्या माहितीनुसार, सकाळी सुमारे १० वाजण्याच्या सुमारास काही हल्लेखोरांनी अक्षय म्हस्केवर अचानक गोळीबार केला. गोळ्या लागल्यानंतर तो खाली कोसळताच आरोपींनी त्याच्यावर कोयत्याने सपासप वार केले. चेहरा आणि शरीरावर गंभीर वार करून त्याची खात्रीशीर हत्या करण्यात आल्याचे पोलिसांनी सांगितले. भररस्त्यात झालेल्या या हल्ल्यामुळे परिसरात भीतीचे वातावरण निर्माण झाले.

वनराज आंदेकर हत्या प्रकरणाशी संबंध

मृत अक्षय म्हस्केचा भाऊ आकाश म्हस्के हा माजी नगरसेवक वनराज आंदेकर हत्या प्रकरणातील आरोपी असून सध्या तुरुंगात आहे. त्यामुळे ही हत्या “रिप्लाय अटॅक” असल्याची चर्चा गुन्हेगारी वर्तुळात रंगली आहे.

आंदेकर गँगवॉरची पार्श्वभूमी

माजी नगरसेवक वनराज आंदेकर यांची काही महिन्यांपूर्वी नाना पेठ परिसरात गोळ्या झाडून आणि धारदार शस्त्रांनी वार करून हत्या करण्यात आली होती. कौटुंबिक वाद, वर्चस्वाची लढाई आणि टोळी संघर्षातून हा वाद चिघळल्याचे तपासात समोर आले होते.

वनराज आंदेकर यांच्या हत्येनंतर आंदेकर आणि कोमकर/म्हस्के गटांमध्ये सुरू असलेल्या संघर्षात आतापर्यंत चार हत्या झाल्याची माहिती समोर येत आहे. तुरुंगात असलेला कुख्यात गुंड बंडू आंदेकर याच्याकडून सूड उगवण्यासाठी हल्ल्यांचे आदेश दिले जात असल्याचा संशय पोलिसांना आहे.

पोलिसांचा कडक बंदोबस्त

घटनेची माहिती मिळताच वरिष्ठ पोलीस अधिकारी, गुन्हे शाखेची पथके आणि स्थानिक पोलीस घटनास्थळी दाखल झाले. पुढील हिंसाचार टाळण्यासाठी परिसरात मोठा पोलीस बंदोबस्त तैनात करण्यात आला असून संवेदनशील भागांमध्ये गस्त वाढवण्यात आली आहे. आरोपींचा शोध घेण्यासाठी विशेष पथके तयार करण्यात आली आहेत.