गडचिरोली शहरातील कारगिल चौकासमोरील बँक ऑफ महाराष्ट्रच्या मुख्य शाखेतील पैसे जमा करण्याच्या एटीएममध्ये बनावट नोटा आढळून आल्याने एकच खळबळ उडाली आहे.
चंद्रपूर जिल्ह्यातील युवकाने बँक ऑफ महाराष्ट्रच्या एटीएममध्ये जमा केल्या बनावट नोटा
गडचिरोली (Fake Currency) : गडचिरोली शहरातील कारगिल चौकासमोरील बँक ऑफ महाराष्ट्रच्या मुख्य शाखेतील पैसे जमा करण्याच्या एटीएममध्ये बनावट नोटा आढळून आल्याने एकच खळबळ उडाली आहे. या प्रकरणी गडचिरोली पोलीस ठाण्यात गुन्हा दाखल करण्यात आला असून एका संशयित युवकाला ताब्यात घेण्यात आले आहे.
युवकास अटक; ७ दिवसांची पोलीस कोठडी
मिळालेल्या माहितीनुसार, ११ मे रोजी संबंधित एटीएममध्ये १०० रुपयांच्या २१ बनावट नोटा, अशी एकूण २ हजार १०० रुपयांची रक्कम आढळून आली. संशयित आरोपी युवक प्रमोद टिकाराम कोवे याने १०० रुपयांच्या २१ नकली नोटा पश्चिम महाराष्ट्रातील मिरज येथील एका खातेदाराच्या खात्यात जमा केल्या होत्या. चौकशीअंती सदर बाब बँकेच्या मुख्य शाखेच्या निदर्शनास आल्यानंतर शाखा व्यवस्थापकांना तातडीने एफआयआर दाखल करण्याचे निर्देश देण्यात आले.
यानंतर गडचिरोली पोलीस ठाण्यात गुन्हा नोंदविण्यात आला असून पोलिसांनी प्रमोद टिकाराम कोवे (वय २३, रा. हळदा, ता. ब्रह्मपुरी, सध्या रा. इंदिरानगर, गडचिरोली) या संशयित युवकाला ताब्यात घेतले आहे. पोलिसांनी या युवकाला न्यायालयात हजर केले असता न्यायालयाने त्याला सात दिवसांची पोलीस कोठडी सुनावली आहे.
या प्रकरणाचा पुढील तपास गडचिरोली पोलीस करीत आहेत.