धानापूरजवळ मालवाहू ट्रकची दुचाकीला धडक
चामोर्शी (गडचिरोली)
आष्टी–चंद्रपूर मार्गावर धानापूर येथील जिनिंगजवळ दुपारच्या सुमारास झालेल्या भीषण अपघातात पती-पत्नीचा दुर्दैवी मृत्यू झाला, तर त्यांच्या सहा वर्षांच्या चिमुकलीचा थोडक्यात जीव वाचल्याची हृदयद्रावक घटना घडली. या घटनेमुळे परिसरात हळहळ व्यक्त होत आहे.
मृतांमध्ये गौतम सुरेश निमसरकर (वय ३६) व वैशाली गौतम निमसरकर (वय ३०, रा. अनखोडा, ता. चामोर्शी, जि. गडचिरोली) यांचा समावेश आहे. तर त्यांची मुलगी सिया (वय ६) ही या अपघातातून बचावली आहे.
मिळालेल्या माहितीनुसार, निमसरकर दांपत्य आपल्या दुचाकीने मुलीसह कामानिमित्त चंद्रपूर येथे गेले होते. काम आटोपून परत येत असताना धानापूर येथील जिनिंगजवळ मालवाहू ट्रकने त्यांच्या दुचाकीला जोरदार धडक दिली. या अपघातात गौतम यांचा जागीच मृत्यू झाला. गंभीर जखमी झालेल्या वैशाली यांना गोंडपिपरी ग्रामीण रुग्णालयात दाखल करण्यात आले, मात्र प्रकृती चिंताजनक असल्याने पुढील उपचारासाठी चंद्रपूरला हलविताना वाटेतच त्यांचा मृत्यू झाला.
अपघातावेळी सिया ही दुचाकीवरून दूर फेकली गेली. मात्र नशिबाने ती गंभीर जखमी होण्यापासून बचावली. आपल्या डोळ्यांसमोर आई-वडिलांचा मृत्यू झाल्याने तिने एकच आक्रोश केला, ज्यामुळे उपस्थितांचे डोळे पाणावले.
गौतम निमसरकर हे अनखोडा ग्रामपंचायतीत संगणक परिचालक म्हणून कार्यरत होते. मनमिळावू स्वभावामुळे त्यांची गावात चांगली ओळख होती. या दुर्दैवी घटनेमुळे अनखोडा गावावर शोककळा पसरली असून सर्वत्र हळहळ व्यक्त केली जात आहे.
