चिखलीत २७ एप्रिल रोजी ‘गो-सन्मान दिवस’ उत्साहात साजरा होणार

चिखली (Cow Honor Day) : देशातील सर्व साधू-संतांच्या आवाहनानुसार यंदापासून २७ एप्रिल हा दिवस ‘गो-सन्मान दिवस’ म्हणून साजरा केला जाणार असून, त्यानिमित्त चिखली नगर व तालुक्यात विविध धार्मिक व सामाजिक कार्यक्रमांचे आयोजन करण्यात आले आहे. या अनुषंगाने दि. २६ एप्रिल रोजी रविवारी सायंकाळी ७ वाजता मौनी बाबा संस्थान येथे राजस्थान येथील संत प.पू. बालकृष्णजी महाराज यांचे प्रवचन आयोजित करण्यात आले आहे. तसेच दि. २७ एप्रिल रोजी सोमवारी सकाळी ९ वाजता वाराणसीचे प.पू. विवेकदास शास्त्री महाराज यांची ‘गो-कथा’ होणार आहे.

कथा संपल्यानंतर उपस्थितांना प्रसाद वितरण करण्यात येणार असून, त्यानंतर तहसील कार्यालयाकडे निवेदन देण्यासाठी रॅली काढण्यात येणार आहे. (Cow Honor Day) गोमातेला ‘राष्ट्रमाता’ घोषित करणे, गोहत्या व गो-धन तस्करी बंद करणे या मागण्यांसाठी स्वाक्षरीयुक्त निवेदन सादर करण्यात येणार आहे. हे निवेदन मा. राष्ट्रपती, मा. पंतप्रधान, मा. राज्यपाल व मा. मुख्यमंत्री यांना पाठविण्यात येणार असल्याची माहिती आयोजकांनी दिली आहे.

या कार्यक्रमासाठी तहसीलदार यांची वेळ घेण्यात आली असून, विशाल नंदीबाबांच्या नेतृत्वात ही रॅली पार पडणार आहे. या भव्य सोहळ्यात नागरिक, माता-भगिनी, विद्यार्थी व युवकांनी मोठ्या संख्येने सहभागी व्हावे, असे आवाहन चिखली तालुका संघचालक शरद भाला यांनी केले आहे.