अकोल्यात लाचखोरी प्रकरण उघड; अतिरिक्त जिल्हाधिकाऱ्यावर गंभीर आरोप

अकोला (Bribery Allegation) : कायद्याने बंदी असली तरी, लाचखोरी अजूनही सुरूच असल्याचे दिसते. अकोल्यात याच संदर्भातील एक धक्कादायक प्रकरण उघडकीस आले असून, एका वरिष्ठ अधिकाऱ्याने खाणी सुरू ठेवण्यासाठी पैशांची मागणी केल्याचा आरोप समोर आला आहे. प्रमोद गायकवाड असे या अतिरिक्त जिल्हाधिकाऱ्याचे नाव असून, त्यांच्या विरोधात एमआयडीसी पोलीस ठाण्यात BNS अंतर्गत गुन्हा नोंदविण्यात आला आहे. याप्रकरणी खाणमालकांनी ऑडिओ क्लिप्ससारखे पुरावे सादर केले आहेत. दरम्यान, गायकवाड यांनी हे सर्व आरोप स्पष्टपणे नाकारले आहेत.

खाणी चालू ठेवण्यासाठी पैशांची मागणी?

उपलब्ध माहितीनुसार, जिल्ह्यात गौण खनिजाच्या सुमारे ७० खाणी कार्यरत आहेत. यामध्ये दगड, गिट्टी, क्रशर आणि मुरूम खाणींचा समावेश आहे. या खाणींचे कामकाज सुरळीत सुरू ठेवण्यासाठी अतिरिक्त जिल्हाधिकारी गायकवाड यांनी प्रत्येक खाणमालकाकडून १५ हजार रुपयांची मागणी केली, तसेच पैसे न दिल्यास कारवाई करण्याची धमकी दिल्याचा आरोप करण्यात आला आहे.

ऑडिओ क्लिप्स पुरावा म्हणून सादर

पैशांची मागणी झाल्याचा आरोप करणाऱ्या खाणमालकांनी अकोल्यातील एमआयडीसी पोलीस ठाण्यात तक्रार दाखल केली. या तक्रारीसोबत त्यांनी संबंधित संभाषणांच्या ऑडिओ क्लिप्सही पुरावा म्हणून पोलिसांकडे दिल्या. तक्रार नोंदवून घेतल्यानंतर सुमारे नऊ दिवसांनी पोलिसांनी अधिकृतपणे गुन्हा दाखल केला.

गंभीर कलमांखाली गुन्हा नोंद

सखोल चौकशीनंतर या प्रकरणात अप.नं. 270/2026 अंतर्गत भारतीय न्याय संहिता (BNS) कलम 308(2), 351(1) तसेच भ्रष्टाचार प्रतिबंधक कायदा (PCA) कलम 7 अन्वये गुन्हा नोंदविण्यात आला आहे. १५ हजार रुपयांची खंडणी मागणे आणि पैसे न दिल्यास व्यवसाय बंद करण्याची धमकी देणे, या आरोपांवरून ही कारवाई करण्यात आली आहे.

निलंबनाची मागणी जोरात

या घटनेमुळे संपूर्ण परिसरात खळबळ उडाली असून, संबंधित अधिकाऱ्यावर कठोर कारवाई करावी, तसेच तात्काळ निलंबित करावे, अशी मागणी नागरिकांकडून केली जात आहे.