क्रांतीकारी शेतकरी संघटनेचे विनायक सरनाईक यांनी महसूल मंत्री मा. चंद्रशेखर बावनकुळे यांची चिखली तहसील कार्यालयातील दरबारात शेतकऱ्यांसह भेट घेऊन विविध प्रलंबित प्रश्न मांडले.
चिखली (Agriculture Subsidy) : क्रांतीकारी शेतकरी संघटनेचे विनायक सरनाईक यांनी महसूल मंत्री मा. चंद्रशेखर बावनकुळे यांची चिखली तहसील कार्यालयातील दरबारात शेतकऱ्यांसह भेट घेऊन विविध प्रलंबित प्रश्न मांडले. यावेळी शेतकऱ्यांच्या अडचणींवर प्रकाश टाकत, रखडलेले कृषी औजारांचे अनुदान तात्काळ देण्यात यावे, तसेच अर्ज केलेल्या शेतकऱ्यांना पूर्वसंमती मिळावी, अशी मागणी करण्यात आली. गोपीनाथ मुंडे अपघात विमा योजनेचे अनुदान ऑनलाइन प्रक्रियेमुळे अडकून पडल्याने पात्र लाभार्थ्यांना त्वरित मदत मिळावी, अशीही भूमिका मांडण्यात आली.
तसेच पीएम किसान योजनेची संकेतस्थळे बंद असल्यामुळे अनेक वारस शेतकरी योजनेपासून वंचित राहत आहेत. नव्याने सातबारा तयार झालेल्या व वाटणी झालेल्या शेतकऱ्यांचा पीएम किसान तसेच सीएम किसान सन्मान योजनेत समावेश करून त्यांना अनुदान देण्यात यावे, अशी मागणी करण्यात आली.
या सर्व मागण्यांवर महसूल मंत्री बावनकुळे यांनी सकारात्मक भूमिका घेत, मागण्या न्याय्य असल्याचे सांगत तातडीने कार्यवाही करण्याचे आश्वासन दिले. संबंधित निवेदनावर त्यांनी निर्देश देत, त्यांच्या स्वीय सहाय्यकांमार्फत दोन दिवसांत कार्यवाही केली जाईल, असे सांगण्यात आले.
दरम्यान, या आश्वासनानंतर चिखली तालुक्यातील शेतकऱ्यांच्या प्रलंबित प्रश्नांना लवकरच दिलासा मिळेल, अशी अपेक्षा व्यक्त होत आहे.