Adgaon Gram Panchayat: आडगावात 20 वर्षांपासून प्रलंबित असलेल्या नमुना नंबर 8 च्या प्रश्नाचे समाधान घडले. सरपंचांच्या प्रयत्नांमुळे गरीब कुटुंबांना योजनांचा लाभ मिळाला.
हिंगोली (Adgaon Gram Panchayat) : मौजे आडगाव येथे गेल्या दोन दशकांपासून प्रलंबित असलेला गोरगरिबांचा नमुना नंबर 8 चा प्रश्न आज मार्गी लागला. सरपंच ज्ञानबा मुटकुळे यांच्या अथक प्रयत्नांमुळे 27 एप्रिल रोजी ग्रामपंचायत कार्यालयात आयोजित विशेष कार्यक्रमात 20 ते 25 लाभार्थी कुटुंबांना नमुना 8 चे वाटप करण्यात आले.
गावातील अनेक भूमिहीन व गरीब कुटुंबे गेल्या 20 वर्षांपासून घरकुल व इतर शासकीय योजनांच्या लाभापासून वंचित होती. नमुना 8 नसल्याने बँक कर्ज, घरकुल योजना, वीज कनेक्शन अशा अनेक सुविधांपासून ही कुटुंबे दूर होती. सरपंच ज्ञानबा मुटकुळे यांनी पदभार स्वीकारल्यानंतर हा प्रश्न हाती घेतला. महसूल विभाग, तहसील कार्यालय व जिल्हा प्रशासनाकडे सातत्याने पाठपुरावा करून कागदपत्रांची पूर्तता केली. त्यांच्या मेहनतीला आज यश आले.
नमुना 8 मिळाल्यानंतर लाभार्थ्यांच्या चेहऱ्यावर समाधान व आनंद दिसून आला. या कार्याबद्दल सर्व लाभार्थ्यांच्या वतीने सरपंच ज्ञानबा मुटकुळे, ग्रामविकास अधिकारी व संपूर्ण ग्रामपंचायत सदस्यांचा शाल व श्रीफळ देऊन सत्कार करण्यात आला. कार्यक्रमाचे सूत्रसंचालन सामाजिक कार्यकर्ते पठाण यांनी केले तर आभार प्रदर्शन उपसरपंच रमेश जाधव यांनी केले. यावेळी बोलताना सरपंच मुटकुळे म्हणाले, "गोरगरिबांना त्यांचा हक्क मिळवून देणे हीच खरी ग्रामपंचायतीची जबाबदारी आहे. पुढील काळातही सर्वसामान्यांच्या प्रश्नांसाठी आम्ही कटिबद्ध राहू."
या कार्यक्रमाला ग्रामपंचायत सदस्य, ग्रामविकास अधिकारी, तलाठी, पोलीस पाटील व मोठ्या संख्येने ग्रामस्थ उपस्थित होते. 20 वर्षांनंतर न्याय मिळाल्याने गावात उत्साहाचे वातावरण निर्माण झाले आहे.
नमुना 8 म्हणजे काय?
नमुना नंबर 8 हा ग्रामपंचायतीचा मालमत्ता नोंदणीचा उतारा आहे. घराची मालकी सिद्ध करण्यासाठी, घरकुल योजना, बँक कर्ज व इतर शासकीय योजनांचा लाभ घेण्यासाठी हा दाखला अत्यावश्यक असतो.