हिंगोली पोलिसांचा अवैध दारू विक्रीवर कठोर प्रहार : एकाच वेळी छापेमारीत 28 गुन्हे दाखल

हिंगोली (Hingoli Illegal Liquor Sale) : जिल्ह्यातील अवैध दारू विक्रीचे समूळ उच्चाटन करण्यासाठी हिंगोली पोलिसांनी मंगळवारी मोठी कारवाई केली. पोलीस अधीक्षक डॉ. नीलाभ रोहन यांच्या नेतृत्वाखाली संपूर्ण जिल्ह्यात एकाच वेळी अचानक छापेमारी करण्यात आली. या धडक कारवाईत तब्बल 28 जणांविरोधात अवैध दारू विक्री प्रकरणी गुन्हे दाखल करण्यात आले आहेत. पोलीस अधीक्षक डॉ. नीलाभ रोहन यांनी अवैध धंद्यांवर नियंत्रण मिळवण्यासाठी वेगवेगळ्या क्लृप्त्या वापरल्या आहेत. अवैध धंदेवाले पोलिसांच्या कारवाईचा सुगावा घेऊन सतर्क राहतात. त्यामुळे यावेळी डॉ. रोहन यांनी कोणतीही पूर्वसूचना न देता सर्व ठाणेदारांना थेट आदेश दिले आणि पूर्ण जिल्ह्यात एकाच वेळी अवैध दारू अड्ड्यांवर छापे टाकण्यात आले.

या (Hingoli Illegal Liquor Sale) कारवाईत सर्व पोलीस ठाण्याचे ठाणेदार, उपविभागीय पोलीस अधिकारी पथक आणि स्थानिक गुन्हे शाखेचे पथक सहभागी झाले होते. पोलिसांच्या कार्यवाहीचा कोणताही सुगावा न लागता अचानक पडलेल्या छाप्यांमुळे अवैध दारू विक्रेत्यांचे कंबरडे मोडले आहे. पोलिसांच्या लगातार छापेमारी आणि मुद्देमाल जप्तीमुळे उत्पन्नापेक्षा खर्चच जास्त होत असल्याने अनेक दारू विक्रेत्यांनी गाशा गुंडाळल्याचे समोर येत आहे.

ही (Hingoli Illegal Liquor Sale) संपूर्ण मोहीम पोलीस अधीक्षक डॉ. नीलाभ रोहन, अप्पर पोलीस अधीक्षक कमलेश मीना, उपविभागीय पोलीस अधिकारी वसमत राजकुमार केंद्रे, उपविभागीय पोलीस अधिकारी हिंगोली शहर कुंदन कुमार वाघमारे आणि प्र. पोलीस उप अधीक्षक मयूर रसाळ यांच्या मार्गदर्शनाखाली राबवण्यात आली. जिल्ह्यातील सर्व ठाणेदार तसेच स्थानिक गुन्हे शाखेच्या पथकांनी ही कारवाई यशस्वी केली. पोलीस विभागाने दिलेल्या माहितीनुसार यानंतरही अवैध दारू विक्री विरोधातील मोहीम अधिक तीव्र करण्यात येणार आहे. जिल्ह्यात कुठेही अवैध दारू विक्री खपवून घेतली जाणार नाही, असा इशारा पोलिसांनी दिला आहे. या धडक कारवाईमुळे जिल्ह्यातील अवैध दारू विक्रीला मोठ्या प्रमाणात आळा बसेल, अशी अपेक्षा व्यक्त केली जात आहे.