परभणीतील दैठणा पोलीसांची कारवाई अंदाजित ३४ लाख ६ हजार रुपयांचा मुद्देमाल जप्त....!
परभणी (Parbhani Police Action) : तालुक्यातील दैठणा परिसरात जनावरांची अमानुष पद्धतीने वाहतूक करणार्‍यांविरुद्ध दैठणा पोलिसांनी धडक कारवाई केली. सोमवार १३ एप्रिल रोजी पहाटे १२.३० वाजण्याच्या सुमारास पाथरी– पोखर्णी मार्गावर ही कारवाई करण्यात आली.
मिळालेल्या माहितीनुसार, (Parbhani Police Action) पाथरीकडून पोखर्णीकडे जाणार्‍या कंटेनर एमएच ०४ जेयू ९६४८) मध्ये २७ जनावरे (गाय व बैल) अत्यंत अमानुषपणे भरून नेली जात असल्याची माहिती दैठणा पोलिसांना रात्री गस्तीदरम्यान मिळाली.या माहितीच्या आधारे दैठणा पोलीस ठाण्याचे सहायक पोलीस निरीक्षक अशोक जायभाये, चालक विलास भवुरे व पथकाने तत्काळ घटनास्थळी धाव घेत कंटेनर अडवून तपासणी केली. तपासणीदरम्यान कंटेनरमध्ये जनावरांना कोणतीही सोय न करता निर्दयपणे कोंबून वाहतूक केली जात असल्याचे आढळून आले. पोलिसांनी तात्काळ २७ जनावरांची सुटका करून त्यांना सुरक्षित ठिकाणी हलविले.
या (Parbhani Police Action) कारवाईत कंटेनरसह जनावरे असा एकूण अंदाजे ३४ लाख ६ हजार रुपयांचा मुद्देमाल जप्त करण्यात आला आहे. संबंधित चालक व अन्य आरोपींविरुद्ध प्राणी क्रूरता प्रतिबंधक कायदा तसेच इतर संबंधित कलमांनुसार तीन आरोपी साहिल सनोफ अब्दुल करीम रा. जोसई जिल्हा मुझपरनगर उत्तर प्रदेश,तोफिक अब्दुल करीम शेख रा. वागारी तालुका जामनेर जिल्हा जळगाव,सावेज अहसान कसार रा.मानोना जिल्हा सारंगपूर उत्तर प्रदेश यांच्यावर गुन्हा दाखल करण्यात आला आहे.पुढील तपास दैठणा पोलीस करीत आहेत.
