चिखली (Diesel Shortage) : जिल्ह्यात गेल्या अनेक दिवसांपासून पेट्रोल-डिझेल इंधन टंचाईची समस्या गंभीर बनली असून त्याचा मोठा फटका शेतकरी व ट्रॅक्टर चालकांना बसत आहे. विशेषतः चिखली व देऊळगाव राजा तालुक्यातील अनेक पेट्रोल पंपांवर डिझेल उपलब्ध नसल्याने शेती मशागतीची कामे खोळंबली आहेत. या पार्श्वभूमीवर प्रशासनाने तातडीने उपाययोजना करून ट्रॅक्टर मालकांना कॅनमध्ये डिझेल उपलब्ध करून द्यावे, अन्यथा येत्या २५ मे रोजी चिखली-जालना महामार्गावर रास्ता रोको आंदोलन करण्यात येईल, असा इशारा शिवसेना उपजिल्हाप्रमुख संतोष पाटील भुतेकर व मंडपगावचे सरपंच सचिनभाई कदम यांनी दिला आहे.
सध्या पावसाळा व खरीप पेरणीचे दिवस जवळ आले असून शेतातील नांगरणी, वखरणी व पेरणीची कामे वेगाने सुरू होणे आवश्यक आहे. मात्र डिझेलअभावी अनेक ट्रॅक्टर जागेवरच उभे राहत असून हजारो हेक्टर शेती मशागतीविना पडून राहण्याची भीती व्यक्त केली जात आहे.
यावेळी त्यांनी सांगितले की, अनेक पेट्रोल पंप चालक प्रशासनाच्या आदेशाचे कारण देत ट्रॅक्टर मालकांना कॅनमध्ये डिझेल देण्यास नकार देत आहेत. परिणामी ट्रॅक्टर घेऊनच पंपावर जावे लागत असून तासन्तास रांगेत थांबावे लागत आहे. ही परिस्थिती शेतकऱ्यांसाठी आर्थिकदृष्ट्या व मानसिकदृष्ट्या त्रासदायक ठरत आहे.
ज्या पेट्रोल पंप चालकांनी शेतकऱ्यांना कॅनमध्ये डिझेल भरून दिले, त्यांच्यावर प्रशासनाने दंडात्मक कारवाई केल्याचा आरोपही यावेळी करण्यात आला. प्रशासनाची ही भूमिका शेतकरीविरोधी असून तातडीने त्यात बदल करावा, अशी मागणी त्यांनी केली.
प्रशासनाने परिस्थितीचे गांभीर्य ओळखून सर्व पेट्रोल पंपांना ट्रॅक्टर मालकांना कॅनमध्ये डिझेल देण्याचे निर्देश द्यावेत व शेती मशागतीसाठी शेतकऱ्यांना प्राधान्य द्यावे, अशी मागणी करण्यात आली आहे.
दरम्यान, मागण्यांकडे दुर्लक्ष झाल्यास सोमवार, दिनांक २५ मे २०२६ रोजी अंडेरा पोलीस स्टेशन हद्दीत चिखली-जालना महामार्गावर असंख्य ट्रॅक्टरसह रास्ता रोको आंदोलन करण्यात येईल, असा इशाराही संतोष पाटील भुतेकर व सचिनभाई कदम यांनी प्रशासनाला दिला आहे.
