ब्राह्मणवाडा येथील ५९ वर्षीय अल्पभूधारक शेतकरी तानाजी मोरे यांनी नापिकीच्या चिंतेत विषारी औषध प्राशन केले. उपचारादरम्यान त्यांचा मृत्यू झाला.
औंढा नागनाथ तालुक्यातील शेतकऱ्यांच्या आत्महत्येची तिसरी घटना
औंढा नागनाथ : तालुक्यातील ब्राह्मणवाडा येथे नापिकीमुळे एका शेतकऱ्याने विषारी औषध प्राशन करून आत्महत्या केल्याची घटना २८ सप्टेंबर रोजी घडली.
मयत तानाजी विठोबा मोरे (वय ५९) हे अल्पभूधारक शेतकरी होते. त्यांच्या गावशिवारात सुमारे चार एकर शेती होती. त्यांच्यावर महाराष्ट्र ग्रामीण बँकेचे कर्जही होते.
यंदाच्या खरीप हंगामात मागील दोन महिन्यांपासून पावसाने दडी दिल्याने शेतातील पिकांची अवस्था बिकट झाली होती. त्यांचे सोयाबीन पीक डोळ्यासमोर वाळून गेल्याने ते चिंतेत होते. सततची नापिकी आणि यंदा हातातून जात असलेले पीक यामुळे त्यांनी शेतात फवारणीसाठी वापरण्यात येणारे विषारी औषध प्राशन केले.
त्यानंतर त्यांना तातडीने उपचारासाठी हिंगोली येथील खासगी रुग्णालयात दाखल करण्यात आले होते. मात्र, उपचार सुरू असताना रविवारी त्यांचा मृत्यू झाला.
तानाजी मोरे यांच्या पश्चात पत्नी, दोन मुली, दोन मुले, सुना आणि नातवंडे असा परिवार आहे.
औंढा नागनाथ तालुक्यात शेतकऱ्यांच्या आत्महत्येची ही तिसरी घटना असल्याचे सांगण्यात येत आहे.