दुष्काळग्रस्त शेतकऱ्यांच्या मदतीसाठी नवरात्रोत्सव आणि सांस्कृतिक कार्यक्रमांचा खर्च वळवण्याचं आवाहन; ७५ टक्के भागात दुष्काळी उपाययोजना
महाराष्ट्रातील दुष्काळी परिस्थितीच्या पार्श्वभूमीवर उपमुख्यमंत्री एकनाथ शिंदे यांनी नागरिक आणि शिवसेनेच्या पदाधिकाऱ्यांना महत्त्वाचं आवाहन केलं आहे. शेतकरी संकटात असताना आगामी नवरात्रोत्सव तसेच इतर धार्मिक, सांस्कृतिक कार्यक्रम साधेपणाने साजरे करावेत आणि शक्य असल्यास या कार्यक्रमांसाठीचा निधी दुष्काळग्रस्त शेतकऱ्यांच्या मदतीसाठी व पुनर्वसनासाठी वापरावा, अशी भूमिका शिंदे यांनी मांडली आहे.
यंदाच्या पावसातील तुटीचा मोठा फटका शेतीला बसला आहे. खरीप हंगामातील पिकांवर परिणाम झाल्यानंतर आता रब्बी हंगामाचीही चिंता निर्माण झाली आहे. अनेक भागांत पाणीटंचाईचा प्रश्न गंभीर झाला असून पिण्याच्या पाण्यासाठी टँकरवर अवलंबून राहण्याची वेळ आली आहे. राज्य सरकारने २६५ तालुक्यांमध्ये दुष्काळी परिस्थिती जाहीर करून विविध उपाययोजना लागू केल्या आहेत. राज्यातील ३८७ तालुक्यांपैकी २६५ तालुके या यादीत असल्याने सुमारे ७५ टक्के भाग दुष्काळाच्या कक्षेत आला आहे.
‘बळीराजाच्या पाठीशी उभं राहणं ही सामाजिक जबाबदारी’
एकनाथ शिंदे यांनी आपल्या पोस्टमधून दुष्काळामुळे निर्माण झालेल्या परिस्थितीचा उल्लेख करत शेतकऱ्यांच्या मदतीसाठी समाजानेही पुढाकार घेण्याचं आवाहन केलं आहे. पावसाने साथ न दिल्यामुळे पिकांचं नुकसान झालं असून अनेक शेतकरी संकटात सापडले आहेत. अशा वेळी सरकारसोबतच समाजानेही अन्नदात्याच्या पाठीशी ठामपणे उभं राहण्याची गरज असल्याचं त्यांनी म्हटलं आहे.
राज्याच्या तिजोरीवरील पहिला हक्क बळीराजाचा असल्याची भूमिका त्यांनी पुन्हा मांडली. सरकार शेतकऱ्यांना आवश्यक ती मदत करण्यासाठी प्रयत्नशील असल्याचं सांगतानाच, शिवसेना देखील शेतकऱ्यांच्या मदतीसाठी पूर्ण ताकदीने उभी असल्याचं शिंदे यांनी नमूद केलं.
यंदा पावसाने दगा दिला, निसर्गाचा प्रकोप झाला. पिके करपली. अनेक ठिकाणी उभ्या पिकांनी माना टाकल्या. त्यामुळे राज्यातील हजारो शेतकरी हवालदिल झाले आहेत. आपला अन्नदाता बळीराजा दुष्काळाच्या भीषण परिस्थितीशी दोन हात करत असताना त्याच्या पाठीशी खंबीरपणे उभं राहणं ही आपल्या सर्वांची नैतिक…
— Eknath Shinde - एकनाथ शिंदे (@mieknathshinde) October 1, 2026
उत्सव साधेपणाने साजरे करण्याचं आवाहन
शेतकरी चिंतेत असताना धार्मिक आणि सांस्कृतिक उत्सव मोठ्या थाटामाटात साजरे करणं योग्य ठरणार नाही, असं शिंदे यांनी म्हटलं आहे. त्यामुळे नवरात्रोत्सव तसेच आगामी काळातील इतर उत्सव, समारंभ आणि सांस्कृतिक कार्यक्रम शक्य तितक्या साध्या पद्धतीने आयोजित करण्याचं आवाहन त्यांनी केलं.
या कार्यक्रमांवरील खर्चाचा काही भाग दुष्काळग्रस्त शेतकरी आणि त्यांच्या पुनर्वसनासाठी वापरता यावा, यासाठी शिवसेनेचे पदाधिकारी, सामाजिक संस्था आणि नागरिकांनी पुढाकार घ्यावा, असंही त्यांनी म्हटलं आहे. उत्सवावरील खर्चातून शेतकऱ्यांच्या चेहऱ्यावर आनंद आणता आला, तर तीच आदिशक्तीची खरी सेवा ठरेल, अशी भावना शिंदे यांनी व्यक्त केली.
२६५ तालुक्यांत दुष्काळी उपाययोजना
राज्य सरकारने २६५ तालुक्यांमध्ये दुष्काळी परिस्थिती जाहीर केली असून या भागांसाठी विविध सवलती आणि मदत उपाय लागू करण्यात आले आहेत. यामध्ये अन्नधान्याचा पुरवठा, पिण्याच्या पाण्याची व्यवस्था, जनावरांसाठी चाऱ्याची उपलब्धता आणि विद्यार्थ्यांना परीक्षा शुल्कातून सवलत अशा उपाययोजनांचा समावेश आहे.
दुष्काळ जाहीर झाल्यानंतर मदतकार्याला गती देण्यासाठी प्रशासनाकडून पुढील कार्यवाही सुरू आहे. पीक परिस्थिती आणि नुकसानीच्या आधारे पुढील मदतीबाबत निर्णय घेतला जाणार असल्याची माहितीही समोर आली आहे.
