पालकांची शाळा सुरू करण्याची मागणी
मानोरा (Zilla Parishad schools) : मानोरा तालुक्यातील चाकुर येथील जिल्हा परिषद प्राथमिक शाळा गेल्या काही महिन्यांपासून बंद असल्याने गावातील विद्यार्थ्यांचे शैक्षणिक नुकसान होत आहे. शाळा बंद असल्याने मुलांना शिक्षणासाठी दुसऱ्या गावात जावे लागत असून त्यांच्या सुरक्षिततेचा व आर्थिक भाराचा प्रश्न निर्माण झाला आहे. या पार्श्वभूमीवर चाकुर येथील शाळा पूर्ववत सुरू करण्यात यावी, असे निवेदन गट शिक्षणाधिकारी अनिल पवार यांना दि. ५ मे रोजी शेकडो ग्रामस्थ व पालकांनी दिले आहे.
दिलेल्या विनंती अर्जात पालकांनी म्हटले आहे की, चाकुर येथील जि.प. शाळा बंद (Zilla Parishad schools) असण्यामागे शिक्षकांची अनुपलब्धता व इतर काही प्रशासकीय अडचणी ही मुख्य कारणे आहेत. या शाळेत प्रामुख्याने गरीब आणि गरजू कुटुंबातील मुले शिक्षण घेतात. शाळा बंद असल्याने या विद्यार्थ्यांना शिक्षणासाठी दुसऱ्या गावात जावे लागत आहे, जे त्यांच्या सुरक्षिततेच्या आणि आर्थिक दृष्टिने गैरसोयीचे आहे. आमच्या मुलांचे शैक्षणिक भविष्य विचारात घेऊन, या प्रकरणात वैयक्तिक लक्ष द्यावे आणि चाकुर येथील जि.प. शाळा लवकरात लवकर सुरू करण्याचे आदेश द्यावेत. शाळेसाठी आवश्यक असणारे शिक्षक आणि इतर सोयीसुविधा उपलब्ध करून द्याव्यात, अशी मागणी केली आहे.
आम्ही ग्रामस्थ शाळेच्या दुरुस्तीसाठी आणि इतर कामांसाठी प्रशासनाला पूर्ण सहकार्य करण्यास तयार आहोत, असेही पालकांनी नमूद केले आहे. प्रशासनाने सकारात्मक प्रतिसाद देऊन शाळा तातडीने सुरू करावी, अशी अपेक्षा सर्व गावकरी पालकांनी व्यक्त केली आहे. निवेदनावर शेकडो ग्रामस्थ व पालकांच्या स्वाक्षऱ्या आहेत.
