हिंगोली (Hingoli Police Colony Burglary) : पोलिसांच्या नाकावर टिच्चून चोरट्यांनी चोर्‍यांचे सत्र सुरुच ठेवले आहे. शहरातील नवीन पोलिस वसाहतीमधील पोलिस उपनिरीक्षकाचे घर फोडून चोरट्यांनी २ लाख ९४ हजार रुपयाचा ऐवज चोरून नेला. चोरट्यांनी पोलिसांना आवाहन दिले आहे.
हिंगोली शहरातील खटकाळी रस्त्यावर नवीन पोलिस वसाहत असून अनेक पोलिस अधिकारी व कर्मचार्‍यांसाठी या ठिकाणी निवासस्थाने उपलब्ध करून दिले आहेत. पोलिस वसाहतीच्या सी-विंग मध्ये पोलिस उपनिरीक्षक शाम खुळे यांचे निवासस्थान आहे. १२ सप्टेंबर रोजी त्यांच्या घरातील सदस्य बाहेरगावी गेल्याने पोलिस उपनिरीक्षक शाम खुळे यांनी निवासस्थानाला कुलूप लावून कर्तव्यावर गेले होते. अज्ञात चोरट्यांनी त्यांच्या घराला कुलूप असल्याचे पाहून कुलूप तोडून आतमध्ये प्रवेश केला. यावेळी खुळे यांच्या घरातील साहित्याची उचका उचक करून लोखंडी कपाटाचा कुलूप तोडून त्यातील नगदी १ लाख ५ हजार ७४० रुपये व १ लाख ८९ हजार रुपयाचे सोन्या -चांदीचे दागिने असा एकूण २ लाख ९४ हजार ७४० रुपयाचा मुद्देमाल चोरून नेला. खुळे हे कर्तव्यावरून परत आल्यानंतर त्यांच्या घराचे कुलूप तुटलेल्या अवस्थेत दिसून आल्याने त्यांनी हिंगोली शहर पोलिसांना या बाबतची माहिती दिली.
घटनास्थळी पोलिस निरीक्षक देवेंद्रसिंह ठाकुर, सहाय्यक पोलिस उपनिरीक्षक दिपक मस्के, पोलिस उपनिरीक्षक गजानन गिरी, सहाय्यक पोलिस उपनिरीक्षक संजय मार्वेâ, जमादार अशोक धामणे, एम.एम. शेख यांच्या पथकाने घटनास्थळी भेट देवून परिसरातील सीसीटिव्ही फुटेज पाहणी केली. यामध्ये एका ठिकाणाी दोन ते तीन चोरटे तोंडाला रुमाल बांधलेल्या अवस्थेत दिसून आले. या प्रकरणात पोलिस उपनिरिक्षक शाम खुळे यांनी दिलेल्या फिर्यादीवरून अज्ञात दोन चोरट्यावर गुन्हा दाखल करण्यात आला.या प्रकरणाचा पुढील तपास पोलिस उपनिरीक्षक गजानन गिरी हे करीत आहेत.
हिंगोली शहरामध्ये चोर्‍यांचे सत्र सुरुच आहे. एकीकडे चोर्‍या होत असताना त्याचा उलगडा करण्यात पोलिस यंत्रणा कमकुवत ठरत आहे. हिंगोली शहरामध्ये वाहन चोरीच्या घटनाही अनेक घडल्या आहेत. चोरट्यांनी पोलिसांना आवाहन दिले आहे. सध्या सणासुदीचे दिवस सुरु असताना चक्क पोलिस वसाहतीमधील लाईन ईंचार्ज शाम खुळे यांचे घर फोडून २ लाख९४ हजार रुपयाची घरफोडी केल्याने पोलिस वसाहतीमधील सुरक्षा धोक्यात आली आहे.
