दर्यापूर शहरात किरकोळ वादातून भर दिवसा युवकाची हत्या

शहरात भीतीचे वातावरण

दर्यापूर (Daryapur youth murder) : दर्यापूर शहरातील आनंद नगर परिसरात किरकोळ वादातून एका युवकाची भर दिवसा हत्या झाल्याची धक्कादायक घटना घडली असून, या घटनेमुळे शहरात भीतीचे वातावरण निर्माण झाले आहे. मिळालेल्या माहितीनुसार, आनंद नगर येथील रहिवासी प्रज्वल तायडे (वय 19) हा दुपारच्या सुमारास आपल्या घरी एकटाच असताना काही अज्ञात व्यक्तींनी घरात येऊन त्याच्यावर धारदार शस्त्राने हल्ला केला. आरोपींनी प्रज्वलवर चाकूने वार करून त्याची निर्घृण हत्या केल्याची माहिती समोर आली आहे.

घटनेची माहिती मिळताच परिसरात एकच खळबळ उडाली. नागरिकांनी मोठ्या प्रमाणात घटनास्थळी गर्दी केली होती. भर दिवसा घडलेल्या या प्रकारामुळे शहरातील नागरिकांमध्ये भीतीचे वातावरण पसरले असून, “शहरात कायद्याचा धाक राहिला नाही का?” असा प्रश्नही उपस्थित केला जात आहे. सदर घटनेची (Daryapur youth murder) माहिती मिळताच दर्यापूर पोलीस घटनास्थळी दाखल झाले असून, पंचनामा करून पुढील तपास सुरू करण्यात आला आहे. आरोपींचा शोध घेण्यासाठी पोलिसांकडून विविध पथके रवाना करण्यात आल्याची माहिती आहे.