कळंबोली येथील रोडपाली गणपती विसर्जन तलावात बुडणाऱ्या एका ३५ वर्षीय महिलेचे प्राण वाचवण्यात कळंबोली पोलिसांनी धाडसी कामगिरी केली.
नवी मुंबई (Police Bravery) : कळंबोली येथील रोडपाली गणपती विसर्जन तलावात बुडणाऱ्या एका ३५ वर्षीय महिलेचे प्राण वाचवण्यात कळंबोली पोलिसांनी धाडसी कामगिरी केली. बीट मार्शल पोलिसांनी स्वतःचा जीव धोक्यात घालून हे बचावकार्य यशस्वी केले.
दुपारी सुमारे १२:३० वाजण्याच्या सुमारास एका महिलेने तलावात उडी मारून आत्महत्येचा प्रयत्न केल्याची माहिती कळंबोली पोलिसांना मिळाली. माहिती मिळताच बीट मार्शल पोलिस कॉन्स्टेबल आकाश वानखेडे आणि कॉन्स्टेबल सागर माळी तात्काळ घटनास्थळी दाखल झाले.
घटनास्थळी पोहोचल्यावर महिला पाण्यात बुडत असल्याचे दिसताच कॉन्स्टेबल सागर माळी यांनी क्षणाचाही विलंब न करता तलावात उडी मारली आणि महिलेचे प्राण वाचवले. त्यानंतर तिला पोलिस वाहनातून तत्काळ आशा रुग्णालयात दाखल करण्यात आले. डॉक्टरांनी तिची प्रकृती स्थिर असल्याचे सांगितले.
दरम्यान, सदर महिलेची ओळख अनीता बालाजी नांदे (वय ३५, रा. कळंबोली) अशी झाली असून ती मानसिकदृष्ट्या अस्थिर असल्याची माहिती मिळाली आहे. पुढील उपचारासाठी तिला तिच्या भावाच्या उपस्थितीत एमजीएम रुग्णालयात हलविण्यात आले.
कळंबोली पोलिसांच्या या धाडसी आणि तत्पर कामगिरीचे सर्वत्र कौतुक होत आहे.