Parbhani SIR work: पुढील तीन ते चार दिवसात सर्व बिएलओ यांच्याकडून एसआयआरचे काम पूर्ण होणे अपेक्षित आहे. त्यासाठी यंत्रणांची मदत घ्यावी, नगरसेवक लोकप्रतिनिधी यांना सहभागी करुन घ्या
महापालिका आयुक्त नितीन नार्वेकर यांचा आढावा बैठकीत कर्मचार्यांना इशारा
परभणी (Parbhani SIR work) : पुढील तीन ते चार दिवसात सर्व बिएलओ यांच्याकडून एसआयआरचे काम पूर्ण होणे अपेक्षित आहे. त्यासाठी यंत्रणांची मदत घ्यावी, नगरसेवक लोकप्रतिनिधी यांना सहभागी करुन घ्या, कामामध्ये कुचराई केल्यास संबंधित बिएलओ विरुध्द गुन्हा नोंद करण्याची कार्यवाही करण्याचा इशारा महापालिका आयुक्त नितीन नार्वेकर यांनी आढावा बैठकीत दिला.
बुधवारी महापालिका आयुक्तांच्या दालनात पार पडलेल्या आढावा बैठकीस उपविभागीय अधिकारी उदयसिंह भोसले, तहसिलदार संदीप राजापूरे, उपायुक्त प्रज्ञावंत कांबळे, सहाय्यक आयुक्त तुकाराम कदम, गजानन जाधव, अल्केश देशमुख, मोहम्मद जावेद यांच्यासह बिएलओ, सुपरवायझर यांची उपस्थिती होती. या बैठकीत एसआयआर मॅपिंगमध्ये उत्कृष्ट काम केलेले महापालिकेचे कर्मचारी मुजीब रहेमान, जालिंदर कांबळे यांचा सन्मान करण्यात आला. शहरातील सर्व प्रभागात उर्वरित मॅपिंगचे काम पूर्ण करुन घ्यावे, यासाठी नागरीकांनी बिएलओ यांच्याशी संपर्क साधावा, असे आवाहन करण्यात आले आहे. सुपरवायझर आणि बिएलओ यांनी घरोघरी जावून मॅपिंगचे काम पूर्ण करावे, असे आदेश देण्यात आले आहेत. कामामध्ये कुचराई केल्यास संबंधितांवर कारवाई करण्याचा इशारा देण्यात आला आहे.
नागरिकांनी मॅपिंग करुन घ्यावी
नागरिकांनी आपल्या जवळच्या मतदान केंद्रावर बुथ अधिकारी यांना संपर्क करुन माहिती द्यावी. (Parbhani SIR work) आपली आणि परिवारातील सदस्यांची मॅपिंग करुन घ्यावी, असे अवाहन उपविभागीय अधिकारी उदयसिंह भोसले यांनी केले आहे.