परभणीत वृध्द आई- वडिलांना रस्त्यावर सोडले; मुलगा,सुनेवर गुन्हा

पूर्णा तालुक्यातील पिंपरण येथील घटना चुडावा पोलिसात गुन्हा दाखल

परभणी (Parbhani case registered) : वृध्द आई- वडिलांचा सांभाळ व संरक्षणाची जबाबदारी असताना त्यांना रस्त्यावर सोडून देण्यात आले. पिडित वडिलांनी दिलेल्या तक्रारीवरुन मुलगा आणि सुनेविरुध्द ज्येष्ठ नागरीक आणि पालक यांचे पालन पोषण आणि कल्याण अधिनियम अंतर्गत चुडावा पोलीस ठाण्यात गुन्हा दाखल करण्यात आला आहे.

भिमराव जयंता धुतराज यांनी तक्रार दिली आहे. फिर्यादीला दोन मुलं आहेत. फिर्यादीचा लहाना मुलगा आणि सुन मुंबई येथे वास्तव्यास आहेत. सुन शासकीय सेवेत असून मुलगा इंजिनिअर आहे.  काही दिवसापूर्वी फिर्यादी व त्यांच्या मोठ्या मुलाने जमा केलेले सहा लाख रुपये छोट्या मुलाला दिले होते. लहान मुलगा आणि सुन सांभाळ करत नसल्याने या बाबत ज्येष्ठ नागरीक कल्याण न्यायाधिकरण यांच्याकडे तक्रार दाखल केली. तेंव्हा या अर्जावर सुनावणी होत आई- वडिलांना प्रतिमाह ३ हजार रुपये देण्या बाबत आदेश देण्यात आले.

या (Parbhani case registered) आदेशाची अंमलबजावणी होत नसल्याने जिल्हादंडाधिकारी यांच्याकडे अर्ज करण्यात आला. त्यानंतर संबंधित मुलगा आणि सुनेवर गुन्हा दाखल करण्याचे पत्रक काढण्यात आले. आई- वडिलांचा सांभाळ न केल्या प्रकरणी धम्मपाल धुतराज, विभा धुतराज यांच्यावर चुडावा पोलिसात गुन्हा दाखल करण्यात आला आहे.