झोपलेल्या महिलेचा तोंड दाबून विनयभंग

हिंगोली (Molestation Case) : हिंगोली ग्रामीण पोलीस ठाणे हद्दीतील एका गावात झोपलेल्या ४० वर्षीय महिलेचा तोंड दाबून विनयभंग केल्याची धक्कादायक घटना उघडकीस आली आहे. याप्रकरणी आरोपी तेजस छगन भिसे उर्फ मुन्ना याच्याविरुद्ध गुन्हा दाखल करण्यात आला आहे.

पोलिस सूत्रांकडून मिळालेल्या माहितीनुसार, संबंधित महिला घरात झोपलेली असताना आरोपी तेजस छगन भिसे उर्फ मुन्ना हा घरात शिरला. त्याने महिलेचे तोंड दाबून तिचा विनयभंग केला. यावेळी महिलेला जाग आल्यानंतर तिने प्रतिकार करण्याचा प्रयत्न केला असता आरोपीने पुन्हा तिचे तोंड दाबून आवाज केल्यास जीवे मारून टाकण्याची धमकी दिली.

मात्र महिलेने धाडस दाखवत आरोपीला ढकलून देत आरडाओरड केली. महिलेचा पती जागा होताच आरोपी घटनास्थळावरून पळून गेला.

या प्रकरणी दि. २२ मे रोजी हिंगोली ग्रामीण पोलीस ठाण्यात तेजस छगन भिसे उर्फ मुन्ना याच्याविरुद्ध गुन्हा दाखल करण्यात आला असून पुढील तपास बापुराव चव्हाण हे करीत आहेत.