आसोला खुर्दसह इतर गावालगत शासकीय जागेतून मोठ्या प्रमाणात अवैधरित्या उत्खनन व वाहतूक सुरू असून महसूल विभागाचे मंडळ अधिकारी व तलाठी याकडे हेतुपुरस्सर दुर्लक्ष करीत असल्याचा आरोप होत आहे.
रात्रीच्या अंधारात मुरूम माफियाचा धुमाकूळ
मानोरा (Illegal Mining) : तालुक्यात रतनवाडी, आसोला खुर्दसह इतर गावालगत शासकीय जागेतून मोठ्या प्रमाणात अवैधरित्या उत्खनन व वाहतूक सुरू असून महसूल विभागाचे मंडळ अधिकारी व तलाठी याकडे हेतुपुरस्सर दुर्लक्ष करीत असल्याचा आरोप होत आहे. ट्रॅक्टरवर जेसीबीच्या मदतीने रात्रीच्या सुमारास मुरूम लंपास करून त्याची अवैध विक्री केली जात असल्याने महसूल प्रशासनाच्या कार्यपद्धतीवर प्रश्नचिन्ह निर्माण झाले आहे.
नवीनच रुजू झालेल्या तहसीलदारांनी याकडे लक्ष केंद्रित करून अवैध मुरुम वाहतुकीला आळा घालावा, अशी मागणी पर्यावरणप्रेमींमधून होत आहे.
मानोरा तालुक्यातील एकूण सहा महसूल मंडळांतील काही गावालगतच्या शासकीय जमिनीवर जेसीबी मशीनच्या सहाय्याने अवैध मुरूम उत्खनन सुरू असल्याचे सांगितले जात आहे. अनेक गावांमधून रात्रीच्या वेळी मुरुमाने भरलेले ट्रॅक्टर रात्रभर धावत असल्याचे चित्र आहे. याची संपूर्ण माहिती मंडळ अधिकारी व तलाठ्यांना असूनही कोणतीही ठोस कारवाई होत नसल्याने मुरूम माफियांना अभय मिळत असल्याची चर्चा आहे.
काही मुरूम माफिया कमी ब्रासची रॉयल्टी काढून प्रत्यक्षात त्यापेक्षा जास्त प्रमाणात मुरुमाची वाहतूक करीत असल्यामुळे शासनाच्या महसुलाला लाखो रुपयांचा फटका बसत आहे. यामध्ये मंडळ अधिकारी व तलाठी यांचा चिरीमिरीचा संबंध असल्याने याकडे जाणीवपूर्वक दुर्लक्ष केले जात असल्याचा आरोप स्थानिक नागरिकांकडून केला जात आहे.
महसूल उपविभागीय अधिकारी यांच्या पथकाने प्रत्यक्ष घटनास्थळी जाऊन परवानगी व उत्खननाची पडताळणी केल्यास मोठे घबाड उघडकीस येण्याची शक्यता व्यक्त केली जात आहे. यासंदर्भात कोणीही तक्रार केल्यास महसूल विभागातील अधिकारी व कर्मचारी एकमेकांकडे बोट दाखवून जबाबदारी झटकत असल्याचीही नागरिकांची तक्रार आहे.
त्यामुळे रात्रंदिवस सुरू असलेल्या मुरुमाच्या अवैध वाहतुकीवर तातडीने कारवाई करून संबंधित माफियांना पकडावे, अशी मागणी निसर्गप्रेमी नागरिकांमधून होत आहे.