उपनगराध्यक्ष वैशालीताई खेडेकर यांच्याकडून रुग्णालयाची झाडाझडती

आरोग्य प्रशासनाचे कामकाज असमाधानकारक असल्याची खेडेकरांची नाराजी

चिखली (Hospital Inspection) : चिखली येथील उपजिल्हा रुग्णालयातील आरोग्य व्यवस्थेचा भोंगळ कारभार समोर आला असून उपनगराध्यक्ष सौ. वैशालीताई खेडेकर यांनी गुरुवारी (दि. २२ मे) रात्री अचानक रुग्णालयाची झाडाझडती घेत प्रशासनाच्या कामकाजाबाबत तीव्र नाराजी व्यक्त केली. रुग्णालयातील आरोग्य सेवा व प्रशासनाचे काम असमाधानकारक असल्याचे मत त्यांनी यावेळी व्यक्त केले.

रात्री सुमारे ११ वाजताच्या दरम्यान करण्यात आलेल्या या तपासणीत ड्युटीवरील डॉक्टर व नर्सिंग कर्मचारी अनुपस्थित असल्याचे निदर्शनास आले. त्यामुळे उपचारासाठी आलेल्या रुग्णांचे हाल होत असल्याचे चित्र पाहायला मिळाले. आपत्कालीन परिस्थितीतही तत्काळ वैद्यकीय सेवा उपलब्ध नसल्याने रुग्ण व नातेवाईकांमध्ये संताप व्यक्त करण्यात आला.

यावेळी शिवसेना नेते कपिल खेडेकर हेही उपस्थित होते. रुग्णांची होत असलेली परवड पाहून त्यांनी प्रशासनावर टीका करत, “सर्वसामान्य नागरिकांना वेळेवर उपचार मिळणे हा त्यांचा अधिकार आहे. मात्र आरोग्य यंत्रणा गंभीरतेने काम करताना दिसत नाही,” असे सांगितले.

तपासणीदरम्यान रुग्णालयातील प्रशासकीय गोंधळही समोर आला. वैद्यकीय अधिकारी उमर सैय्यद यांचा प्रभार उमेश सावजी यांच्याकडे, तर त्यांचा प्रभार नंदकिशोर जाधव यांच्याकडे असल्याचे सांगण्यात येत होते. मात्र संबंधित अधिकारी वेळेवर उपस्थित नसल्याचे आढळून आले.

अचानक झालेल्या उपनगराध्यक्षांच्या रुग्णालय भेटीमुळे कर्मचाऱ्यांची तारांबळ उडाली. उपनगराध्यक्ष वैशालीताई खेडेकर यांनी जिल्हा शल्य चिकित्सकांशी दूरध्वनीवरून संपर्क साधून परिस्थितीची माहिती दिली. तसेच गैरहजर डॉक्टर व कर्मचाऱ्यांची चौकशी करून योग्य कारवाई करण्याची मागणीही केली.

दरम्यान, या घटनेमुळे चिखली उपजिल्हा रुग्णालयातील आरोग्य सेवेबाबत नागरिकांमध्ये नाराजी व्यक्त होत असून प्रशासनाने तातडीने सुधारणा करावी, अशी मागणी होत आहे.