जनावर दाखला फिस, आठवडी बाजार फिस व दैनिक बाजार फिसचा पार पडला लिलाव
हिंगोली (Hingoli Municipal Council) : नगर परिषद तर्फे सन २०२६-२७ या कालावधी करीता जनावर दाखला फिस, आठवडी बाजार फिस व दैनिक बाजार फिस या बाबत ३० मार्च सोमवार रोजी लिलाव घेण्यात आला. ज्यामध्ये गतवर्षी पेक्षा यंदा आर्थिक उत्पन्न वाढले.
नगर परिषद (Hingoli Municipal Council) सभागृहात नगराध्यक्षा रेखा श्रीराम बांगर यांच्या अध्यक्षतेखाली लिलावाची प्रक्रिया पार पडली. ज्यामध्ये काही जणांनी सहभाग नोंदवला. त्यात १ एप्रिल २०२६ ते ३१ मार्च २०२७ या कालावधीसाठी जनावर दाखल फिस या लिलावामध्ये ओमप्रकाश शामराव बांगर यांनी अधिकची बोली बोलल्याने ५६५०० रुपयावर बोली सोडण्यात आली. आठवडी बाजारासाठी आशिष दिनकर कुटे यांनी १ लाख ४५ हजाराची सर्वाधिक बोली तर दैनिक बाजार फिस करीता ओमप्रकाश शामराव बांगर यांनी ८ लाख ९४ हजाराची सर्वाधिक बोली बोलल्याने त्यांच्या नावाने तीन वेळा पुकार करून हा लिलाव सोडण्यात आला. मागील वर्षी सन २०२५ - २६ या आर्थिक वर्षाकरीता जनावर दाखल्यासाठी ५१ हजार एवढी रक्कम प्राप्त होती. त्यात यंदा १० टक्के वाढ झाल्याने ५६५०० रुपये एवढी रक्कम प्राप्त झाली.
आठवडी बाजारासाठी गतवर्षी १०५१०० रुपये होती. त्यात १० टक्के वाढ होऊन १ लाख ४५ हजार व दैनिक बाजार फिस साठी गतवर्षी ७ लाख ९९ हजार तर यंदा १० टक्के वाढ झाल्याने पालिकेला ८ लाख ९४ हजाराचे उत्पन्न होणार. या (Hingoli Municipal Council) लिलावास गटनेते श्रीराम बांगर, उपाध्यक्ष अ.माबुद बागवान यांच्यासह नगरसेवकांची उपस्थिती होती.
