परभणीत सीएनजी वाहतुक करणारा ट्रक अपघातात उलटला..

३ केव्ही विद्युत पोलला धडक; मोठा अनर्थ टळला

परभणी (CNG truck accident) : पाथरी तालुक्यातील राज्य महामार्ग ६१ वर पोहेटाकळी गावाजवळ सोमवारी मध्यरात्री सीएनजी वाहतूक करणाऱ्या आयशर ट्रक वाहनाचा अपघात झाला. चालकाला झोपेची डुलकी लागल्याने वाहनावरील नियंत्रण सुटून आयशर थेट रस्त्याच्या कडेला असलेल्या महावितरणच्या ३३ केव्ही विद्युत वाहिनीच्या पोलला जाऊन धडकले. सुदैवाने या अपघातात कोणतीही जीवितहानी अथवा दुखापत झाली नाही. 

मिळालेल्या माहितीनुसार एमएच ४३ बीएक्स २३४४ क्रमांकाचे  आयशर ट्रक सीएनजी इंधन घेऊन हुमनाबाद (कर्नाटक) येथून पाथरी येथील हर्षवर्धन पेट्रोल पंपाकडे येत होते. सोमवार २५ मे रोजी रात्री सुमारे २ वाजण्याच्या सुमारास पोहेटाकळी गावाजवळ चालक अभिजीत माधव कानवटे  याला झोपेची डुलकी लागल्याने वाहन रस्त्याच्या बाजूला जाऊन ३३ केव्ही उपकेंद्रांना विद्युत पुरवठा करणाऱ्या महावितरणच्या पोलला धडकले. धडकेनंतर वाहन रस्त्याच्या कडेला उलटून पडले.

अपघाताची माहिती मिळताच सपोनि पंकज शिनगारे यांच्यासह महामार्ग पोलिसांनी (CNG truck accident) घटनास्थळी भेट देऊन परिस्थितीची पाहणी व पंचनामा केला. ज्या ३३  केव्ही विद्युत वाहिनीच्या पोलला सीएनजी इंधन असलेले ट्रक धडकले त्या वाहिनीची तार तुटुन वाहनावर पडली असती तर आजुबाजुला घरे असल्याने मोठी दुर्घटना घडण्याची शक्यता होती. सुदैवाने तसे घडले नाही .