जपानमध्ये सायबर गुन्ह्याशी संबंधित धक्कादायक प्रकरण समोर आले आहे.
Bandai Channel स्ट्रीमिंग सेवेत सुरक्षेतील त्रुटीचा गैरफायदा; 46,812 सदस्यांची खाती रद्द, पोलिसांचा दावा
टोकियो : जपानमध्ये सायबर गुन्ह्याशी संबंधित धक्कादायक प्रकरण समोर आले आहे. Bandai Namco Filmworks च्या Bandai Channel या अॅनिमे स्ट्रीमिंग प्लॅटफॉर्मवर झालेल्या सायबर हल्ल्याप्रकरणी 15 वर्षीय हायस्कूल विद्यार्थ्याला अटक करण्यात आली आहे. तपास यंत्रणांच्या माहितीनुसार, या विद्यार्थ्याने ChatGPT च्या मदतीने सॉफ्टवेअर विकसित करून प्लॅटफॉर्मवरील सुरक्षेतील त्रुटीचा फायदा घेत हल्ला केल्याचा आरोप आहे. या घटनेमुळे 46,812 सदस्यांची खाती रद्द झाली आणि कंपनीच्या सेवा विस्कळीत झाल्या.
टोकियो महानगर पोलिसांच्या माहितीनुसार, नोव्हेंबर 2025 मध्ये या विद्यार्थ्याने Bandai Channel च्या प्रणालीतील सुरक्षेतील कमकुवत दुव्याचा शोध घेत त्याचा गैरवापर केला. सदस्यांच्या खात्यांमध्ये अनधिकृत प्रवेश मिळवण्यासाठी त्याने एक स्वयंचलित प्रोग्राम तयार केल्याचा आरोप आहे. या हल्ल्यामुळे हजारो सदस्यांची नोंदणी रद्द झाली.
चौकशीदरम्यान विद्यार्थ्याने पोलिसांना सांगितले की, खाते रद्द करण्यासाठी आवश्यक असलेला सोर्स कोड त्याने स्वतः तयार केला होता. मात्र, प्रक्रिया पूर्ण होण्यास जास्त वेळ लागत असल्याने ChatGPT ची मदत घेत त्याने तो दुसऱ्या प्रोग्रामिंग भाषेत पूर्ण केला.
तपास अधिकाऱ्यांच्या म्हणण्यानुसार, 4 नोव्हेंबर 2025 रोजी आरोपीने Bandai Channel च्या सर्व्हरवर फसवे आदेश पाठवले. त्यानंतर 6 नोव्हेंबरपासून कंपनीच्या सेवांमध्ये मोठा अडथळा निर्माण झाला. प्रणालीची दुरुस्ती पूर्ण झाल्यानंतर डिसेंबरमध्ये सेवा पूर्ववत करण्यात आली. त्यानंतर Bandai Namco Filmworks ने या प्रकरणाची माहिती पोलिसांना दिली.
पोलिसांच्या तपासात असेही समोर आले आहे की, कंपनीने त्याचा प्रवेश रोखल्यानंतरही विद्यार्थ्याने सुमारे 30 वेळा IP पत्ता बदलून पुन्हा सर्व्हरवर हल्ल्याचे प्रयत्न केले. त्यामुळे त्याच्यावर व्यवसायात फसवणुकीद्वारे अडथळा निर्माण केल्याचा गुन्हा दाखल करण्यात आला आहे.
घटनेच्या वेळी आरोपी हा कनिष्ठ माध्यमिक शाळेचा विद्यार्थी होता. यापूर्वी याच वर्षी जून महिन्यात संगणकाशी संबंधित इतर गुन्ह्यांप्रकरणी त्याला अटक करण्यात आली होती. चौथी इयत्तेत असतानाच त्याने संगणक वापरण्यास सुरुवात केली आणि स्वतःच प्रोग्रामिंग शिकल्याचे त्याने चौकशीत सांगितले.
पोलिसांसमोर जबाब देताना विद्यार्थ्याने कंपनीविषयी कोणताही वैयक्तिक राग नसल्याचे स्पष्ट केले. "या प्लॅटफॉर्मवर अनेक खात्यांमध्ये प्रवेश मिळू शकत होता, त्यामुळे मी त्याला लक्ष्य केले," असे त्याने सांगितल्याचे वृत्त आहे.
दरम्यान, Bandai Namco Filmworks ने प्रभावित ग्राहकांना स्वतंत्रपणे माहिती देत फिशिंग आणि बनावट ई-मेलपासून सावध राहण्याचे आवाहन केले आहे. ज्यांची सदस्यत्वे रद्द झाली होती, त्यांना पुन्हा नोंदणी करण्यास सांगण्यात आले असून, सेवा विस्कळीत राहिलेल्या कालावधीतील सदस्यत्व शुल्क परत करण्याची घोषणाही कंपनीने केली आहे.
कंपनीने जारी केलेल्या निवेदनात, गळती झालेल्या माहितीचा ऑनलाइन गैरवापर झाल्याचा किंवा ती सार्वजनिक झाल्याचा कोणताही पुरावा नसल्याचे स्पष्ट केले आहे. भविष्यात अशा घटना टाळण्यासाठी नियमित सुरक्षा तपासण्या आणि अतिरिक्त उपाययोजना सुरू ठेवण्यात येणार असल्याचेही कंपनीने नमूद केले आहे.