IOB Apprentice Recruitment 2026: इंडियन ओव्हरसीज बँकेत 750 अप्रेंटिस पदांची भरती; 20 जुलैपर्यंत अर्जाची संधी

महाराष्ट्रात 85 जागा; पदवीधर उमेदवारांसाठी सुवर्णसंधी, वयोमर्यादा, शुल्क, स्टायपेंड आणि अर्ज प्रक्रिया जाणून घ्या

नवी दिल्ली : बँकिंग क्षेत्रात करिअर करू इच्छिणाऱ्या पदवीधर उमेदवारांसाठी इंडियन ओव्हरसीज बँकेने (IOB) मोठी भरती जाहीर केली आहे. देशभरातील विविध राज्यांमध्ये 750 अप्रेंटिस पदांसाठी अर्ज मागवण्यात आले असून, ऑनलाइन अर्ज प्रक्रिया 7 जुलै 2026 पासून सुरू झाली आहे. इच्छुक उमेदवारांना 20 जुलै 2026 पर्यंत अर्ज सादर करता येणार आहेत.

या भरती प्रक्रियेत विविध राज्यांमध्ये जागांचे वाटप करण्यात आले आहे. त्यानुसार तामिळनाडूमध्ये सर्वाधिक 200 पदे, उत्तर प्रदेशात 110, महाराष्ट्रात 85, दिल्लीत 53 आणि बिहारमध्ये 35 पदांवर भरती केली जाणार आहे. इतर राज्यांसाठीही स्वतंत्रपणे पदसंख्या निश्चित करण्यात आली आहे.

वयोमर्यादा

या भरतीसाठी अर्ज करणाऱ्या उमेदवारांचे किमान वय 20 वर्षे आणि कमाल वय 28 वर्षे असणे आवश्यक आहे. वयाची गणना 1 जुलै 2026 या तारखेच्या आधारे केली जाईल. आरक्षित प्रवर्गातील उमेदवारांना शासनाच्या नियमानुसार वयोमर्यादेत सवलत दिली जाईल.

आवश्यक शैक्षणिक पात्रता

अर्जदाराने कोणत्याही मान्यताप्राप्त विद्यापीठातून कोणत्याही शाखेतील पदवी पूर्ण केलेली असावी. पदवीधर उमेदवारांनाच या भरतीसाठी पात्रता लागू राहील.

अर्ज शुल्क

उमेदवारांना प्रवर्गानुसार खालीलप्रमाणे अर्ज शुल्क भरावे लागेल:

• सामान्य प्रवर्ग: ₹944
• OBC / EWS: ₹708
• SC / ST / दिव्यांग: ₹236

निवड प्रक्रिया

उमेदवारांची अंतिम निवड लेखी परीक्षेच्या आधारे केली जाईल. परीक्षेत एकूण 100 प्रश्न विचारले जाणार असून त्यामध्ये पुढील विषयांचा समावेश असेल:

• जनरल आणि फायनान्शियल अवेअरनेस
• जनरल इंग्लिश
• क्वांटिटेटिव्ह ॲप्टिट्यूड
• रिझनिंग ॲप्टिट्यूड
• कॉम्प्युटर नॉलेज
• संबंधित विषयावरील प्रश्न

लेखी परीक्षेतील गुणवत्तेनुसार अंतिम गुणवत्ता यादी तयार केली जाईल.

प्रशिक्षणादरम्यान मिळणारे मानधन

निवड झालेल्या उमेदवारांना शाखेनुसार दरमहा पुढीलप्रमाणे स्टायपेंड दिले जाईल:

• मेट्रो शाखा: ₹15,500 प्रति महिना
• शहरी शाखा: ₹14,500 प्रति महिना
• निमशहरी / ग्रामीण शाखा: ₹14,000 प्रति महिना

अर्ज प्रक्रिया

अर्ज करण्यासाठी उमेदवारांनी पुढील प्रक्रिया पूर्ण करावी:

1. इंडियन ओव्हरसीज बँकेच्या अधिकृत संकेतस्थळ www.iob.in ला भेट द्या.
2. होमपेजवरील 'Careers' विभागात जाऊन Apprentice Recruitment 2026 लिंकवर क्लिक करा.
3. नवीन नोंदणी करून अर्जामध्ये आवश्यक माहिती अचूक भरा.
4. आवश्यक कागदपत्रे, छायाचित्र आणि स्वाक्षरी स्कॅन करून अपलोड करा.
5. प्रवर्गानुसार अर्ज शुल्क ऑनलाइन भरून अर्ज सबमिट करा आणि भविष्यातील संदर्भासाठी त्याची प्रिंट जतन करून ठेवा.