राष्ट्रवादी काँग्रेसचे ज्येष्ठ नेते व राज्याचे अन्न व नागरी पुरवठा मंत्री छगन भुजबळ यांच्या दौऱ्यादरम्यान हेलिकॉप्टर लँडिंगवेळी अनपेक्षित प्रकार घडला.
मोकळी जागा पाहून घेतला निर्णय; पायलटवर कारवाईची शक्यता
पुणे (Helicopter Landing Error) : राष्ट्रवादी काँग्रेसचे ज्येष्ठ नेते व राज्याचे अन्न व नागरी पुरवठा मंत्री छगन भुजबळ यांच्या दौऱ्यादरम्यान हेलिकॉप्टर लँडिंगवेळी अनपेक्षित प्रकार घडला. नियोजित हेलिपॅडऐवजी पायलटने चुकून कार पार्किंगच्या मोकळ्या जागेत हेलिकॉप्टर उतरवल्याची माहिती समोर आली आहे. सुदैवाने या घटनेत कोणतीही जीवितहानी झाली नाही आणि सर्वजण सुरक्षित असल्याचे सांगण्यात आले.
ही घटना पुरंदर तालुक्यातील खानवडी येथे घडली. महात्मा फुले जयंतीनिमित्त आयोजित कार्यक्रमासाठी भुजबळ नाशिकहून येथे येत होते. कार्यक्रमासाठी गावात हेलिपॅडची व्यवस्था करण्यात आली होती. मात्र, परिसरात असलेल्या पार्किंगमधील मोकळ्या जागेला हेलिपॅड समजून पायलटने तिथेच हेलिकॉप्टर उतरवल्याचा प्राथमिक अंदाज व्यक्त केला जात आहे.
त्या वेळी पार्किंगमध्ये वाहनांची गर्दी नव्हती, त्यामुळे ही चूक गंभीर अपघातात रूपांतरित होण्यापासून थोडक्यात टळली. भुजबळ हेलिकॉप्टरमधून खाली उतरल्यावर, ते यान पुन्हा अधिकृत हेलिपॅडकडे हलवण्यात आले.
दरम्यान, या घटनेची दखल भुजबळ यांच्या कार्यालयाने घेतली असून, पायलटच्या निष्काळजीपणाबाबत पुढील कारवाई होणार का याकडे लक्ष लागले आहे. कार्यक्रमासाठी राज्यातील अनेक मान्यवर, त्यात देवेंद्र फडणवीस यांच्यासह अन्य नेत्यांची उपस्थिती अपेक्षित होती.