MPSCने राज्यसेवा मुख्य परीक्षा 2026 पुढे ढकलली. स्थापत्य अभियांत्रिकी आणि गट-ब मुख्य परीक्षेलाही स्थगिती; सुधारित वेळापत्रक लवकरच जाहीर होणार.
राज्यसेवा मुख्य परीक्षेसह स्थापत्य अभियांत्रिकी आणि गट-ब मुख्य परीक्षेलाही स्थगिती; प्रश्नपत्रिकांच्या सुरक्षिततेबाबत उमेदवारांमध्ये संभ्रम कायम
MPSC परीक्षेची तयारी करणाऱ्या उमेदवारांसाठी महत्त्वाची अपडेट समोर आली आहे. महाराष्ट्र लोकसेवा आयोगाने (MPSC) राज्यसेवा मुख्य परीक्षा 2026 संदर्भात मोठा निर्णय घेतला असून, 3 ऑक्टोबर ते 1 नोव्हेंबर या कालावधीत नियोजित असलेली परीक्षा पुढे ढकलण्यात आली आहे. परीक्षेचे सुधारित वेळापत्रक आगामी काही दिवसांत जाहीर करण्यात येणार असल्याचे आयोगाने प्रसिद्धिपत्रकातून स्पष्ट केले आहे.
राज्यसेवा मुख्य परीक्षेसोबतच महाराष्ट्र स्थापत्य अभियांत्रिकी मुख्य परीक्षा 2026 आणि महाराष्ट्र गट-ब (अराजपत्रित) मुख्य परीक्षा 2026 या दोन्ही परीक्षांनाही स्थगिती देण्यात आली आहे. या तिन्ही परीक्षांच्या नव्या तारखा नंतर जाहीर करण्यात येणार आहेत.
दरम्यान, पेपर फुटीच्या पार्श्वभूमीवर आगामी परीक्षांच्या प्रश्नपत्रिकांच्या सुरक्षिततेचा मुद्दा चर्चेत आला होता. प्रश्नपत्रिकांच्या सुरक्षेबाबत उमेदवारांकडून सातत्याने प्रश्न उपस्थित केले जात होते. आगामी मुख्य परीक्षेसाठी प्रश्नपत्रिका नव्याने तयार कराव्यात, अशी मागणी विद्यार्थी आणि विद्यार्थी संघटनांकडून करण्यात आली होती.
मात्र, सध्या तयार असलेल्या प्रश्नपत्रिका रद्द करून नव्याने प्रश्नपत्रिका तयार केल्या जाणार आहेत का, याबाबत MPSCकडून अद्याप स्पष्ट माहिती देण्यात आलेली नाही. त्यामुळे परीक्षा स्थगित झाल्यानंतरही प्रश्नपत्रिकांच्या मुद्द्यावर उमेदवारांमध्ये संभ्रम कायम आहे.
राज्यसेवा मुख्य परीक्षा 2026 काही दिवसांवर आली असताना प्रश्नपत्रिकांच्या सुरक्षिततेचा प्रश्न अधिक गंभीरपणे समोर आला होता. याच पार्श्वभूमीवर विद्यार्थ्यांनी प्रश्नपत्रिका नव्याने सेट करण्याची मागणी आयोगाकडे केली होती. गरज भासल्यास परीक्षा पुढे ढकलावी, अशी मागणीही करण्यात आली होती.
याचदरम्यान, राज्यसेवा 2025 च्या मुख्य परीक्षेच्या उत्तरपत्रिकांच्या मूल्यमापनावर काही विद्यार्थी आणि विद्यार्थी संघटनांनी आक्षेप नोंदवले आहेत. या आक्षेपांची दखल घेत MPSCने उत्तरपत्रिकांचे पुनर्मूल्यांकन करण्याचा निर्णय घेतला आहे.
तसेच राज्यातील विविध स्पर्धा परीक्षांच्या पद्धतींचा आढावा घेण्यासाठी राज्य सरकारने उच्चस्तरीय समिती स्थापन केली आहे. राज्यभरातील परीक्षार्थी आणि संबंधित घटकांशी चर्चा करून आदर्श परीक्षा पद्धतीबाबत शिफारशी या समितीकडून करण्यात येणार आहेत.
या सर्व घडामोडींमुळे राज्यसेवा मुख्य परीक्षा पुढे ढकलण्याची मागणी विद्यार्थी, पालक, विद्यार्थी संघटना तसेच काही लोकप्रतिनिधींकडून करण्यात येत होती. अखेर या मागणीची दखल घेत महाराष्ट्र लोकसेवा आयोगाने परीक्षा पुढे ढकलण्याचा निर्णय घेतला आहे. सुधारित वेळापत्रक जाहीर झाल्यानंतर उमेदवारांना परीक्षेच्या नव्या तारखांची माहिती मिळणार आहे.