विभागांकडून मागणीपत्रे सादर न झाल्याने प्रक्रियेला विलंब
मुंबई (MPSC Recruitment Process) : राज्यातील विविध शासकीय विभागांमधील तब्बल 65 हजार 866 रिक्त पदांच्या भरती प्रक्रियेला विलंब होत आहे. अनेक विभागांकडून आवश्यक मागणीपत्रे अद्याप पूर्णपणे सादर करण्यात आलेली नसल्याने भरतीची प्रक्रिया अपेक्षित वेगाने पुढे सरकलेली नाही. त्यामुळे सरकारी नोकरीच्या प्रतीक्षेत असलेल्या उमेदवारांमध्ये असंतोषाचे वातावरण आहे.
उपलब्ध माहितीनुसार, एकूण रिक्त पदांपैकी 46 हजार 464 पदे महाराष्ट्र लोकसेवा आयोगामार्फत (एमपीएससी) भरण्याचे (MPSC Recruitment Process) नियोजन आहे. याशिवाय 16 हजार 896 पोलीस शिपाई पदे आणि 2 हजार 506 शिक्षकांची पदे अनुक्रमे संबंधित भरती यंत्रणा व पवित्र पोर्टलच्या माध्यमातून भरण्यात येणार आहेत. मात्र, एमपीएससीमार्फत भरण्यात येणाऱ्या 46 हजार 464 पदांच्या तुलनेत विविध विभागांनी आतापर्यंत सुमारे 7 हजार पदांसाठीच मागणी नोंदविल्याची माहिती समोर आली आहे.
राज्यातील पाणीपुरवठा, वैद्यकीय शिक्षण, कृषी, महसूल, वित्त, विधी व न्याय, गृह, सार्वजनिक बांधकाम, उच्च व तंत्रशिक्षण आणि सहकार या विभागांमध्ये मोठ्या प्रमाणावर पदे रिक्त आहेत. काही विभागांनी रिक्त पदांच्या तुलनेत अत्यल्प पदांसाठीच भरतीची मागणी सादर केल्याचेही समोर आले आहे.
पाणीपुरवठा विभागात सर्वाधिक 8 हजार 652 पदे रिक्त आहेत. मात्र, त्यापैकी केवळ 67 पदांसाठी एमपीएससीकडे मागणी नोंदविण्यात आली आहे. वैद्यकीय शिक्षण विभागात 7 हजार 868, तर कृषी विभागात सुमारे 6 हजार पदे रिक्त असल्याची माहिती आहे. विधी व न्याय विभागात 2 हजार, तर उच्च व तंत्रशिक्षण आणि सार्वजनिक बांधकाम विभागात प्रत्येकी सुमारे 1 हजार 500 पदे रिक्त आहेत.
दरम्यान, एमपीएससीच्या विविध परीक्षांमधील प्रश्नपत्रिका फुटीच्या प्रकरणामुळे उमेदवारांमध्ये नाराजी निर्माण झाली असून, या पार्श्वभूमीवर उमेदवारांनी आंदोलन केले होते. मुख्यमंत्री देवेंद्र फडणवीस यांनी आंदोलनकर्त्या उमेदवारांच्या प्रतिनिधींशी चर्चा करून प्रश्नपत्रिका फुटीच्या प्रकरणांची एसआयटीमार्फत चौकशी करण्याची घोषणा केली होती. त्यानंतर राज्यातील रिक्त पदांच्या भरतीचा आढावा घेण्यात आला. सर्व संबंधित विभागांनी रिक्त पदांची माहिती आणि भरतीसाठी आवश्यक मागणीपत्रे तातडीने सादर करावीत, असे निर्देश देण्यात आले आहेत. सर्व विभागांकडून माहिती संकलित झाल्यानंतर प्रत्येक विभागातील नेमकी किती पदे भरली जाणार, याचे स्पष्ट चित्र समोर येणार आहे.
