१ ऑक्टोबर २०२६ पासून नवा नियम लागू; Active कार्ड किंवा QR कोड असलेली नोंदणी पावती असल्यास मिळणार सवलतीचा लाभ
एसटीच्या सवलतीच्या प्रवासाचा लाभ घेणाऱ्या महिला आणि ज्येष्ठ नागरिकांसाठी महत्त्वाचा बदल करण्यात आला आहे. महाराष्ट्र राज्य मार्ग परिवहन महामंडळाकडून १ ऑक्टोबर २०२६ पासून अमृत ज्येष्ठ नागरिक, ज्येष्ठ नागरिक आणि महिला प्रवाशांना सवलतीचे तिकीट देण्यासाठी NCMC कार्ड प्रणाली अनिवार्य केली जाणार आहे. त्यामुळे सवलतीच्या प्रवासाची प्रक्रिया अधिक डिजिटल होणार आहे.
शासनाच्या निर्देशानुसार एसटी महामंडळाकडून विविध सामाजिक घटकांना प्रवास भाड्यात सवलत दिली जाते. या सवलतीची नोंद आणि तिकीट वितरण अधिक सुलभ पद्धतीने करण्यासाठी आता NCMC कार्डचा वापर करण्यात येत आहे. पात्र प्रवाशांनी निर्धारित मुदतीपूर्वी कार्ड नोंदणीची प्रक्रिया पूर्ण करण्याचे आवाहन महामंडळाकडून करण्यात आले आहे.
NCMC कार्ड नसल्यास सवलत कशी मिळणार?
१ ऑक्टोबरपासून सवलतीचे तिकीट NCMC कार्डच्या माध्यमातूनच वितरित केले जाणार आहे. मात्र, ज्यांच्याकडे Active NCMC कार्ड आहे किंवा कार्ड नोंदणी केल्याची QR कोड असलेली पावती आहे, अशा प्रवाशांनाही सवलतीचा लाभ घेता येणार आहे.
नोंदणी केल्यानंतर मिळालेली QR कोड असलेली पावती वाहकाच्या ETM मशीनवर स्कॅन करून सवलतीचे तिकीट घेता येईल. ही नोंदणी पावती ३० दिवसांसाठी वैध राहणार आहे. या कालावधीत संबंधित प्रवाशांनी NCMC कार्ड अॅक्टिव्ह करून त्यात आवश्यक रक्कम Top-up करणे गरजेचे आहे.
NCMC कार्डची नोंदणी कुठे करायची?
पात्र प्रवाशांना NCMC कार्डची नोंदणी आणि वितरण एसटी बसस्थानक, आगार तसेच अधिकृत केंद्रांवर करता येणार आहे. या प्रक्रियेसाठी ई-बिक्स टेक्नॉलॉजीज लिमिटेडची अधिकृत एजंट म्हणून नियुक्ती करण्यात आली आहे.
BHIM App द्वारे करता येणार कार्डचे Top-up
NCMC कार्डमध्ये पैसे भरण्यासाठी BHIM Appचा वापर करण्याची सुविधाही उपलब्ध आहे. कार्डवरील QR कोड स्कॅन करून त्यामध्ये Top-up करता येणार आहे.
दरम्यान, आधार बायोमेट्रिक प्रक्रियेदरम्यान बोटांचे ठसे उमटत नसलेल्या प्रवाशांसाठी पर्यायी सुविधाही उपलब्ध करून देण्यात आली आहे. आधारशी लिंक असलेल्या मोबाइल क्रमांकावर प्राप्त होणाऱ्या OTPच्या माध्यमातून NCMC कार्डची नोंदणी करता येणार आहे.
त्यामुळे सवलतीच्या प्रवासासाठी पात्र असलेल्या महिला, ज्येष्ठ नागरिक आणि अमृत ज्येष्ठ नागरिकांनी १ ऑक्टोबर २०२६ पूर्वी NCMC कार्डची नोंदणी करून घेण्याचे आवाहन एसटी महामंडळाने केले आहे.
