Parbhani Illegal Liquor: जिंतूर तालुक्यातील बामणी पोलीस ठाण्याच्या हद्दीतील सावंगी भांबळे येथे तीन ठिकाणी अवैध दारू विक्री सुरू असल्याचा गंभीर आरोप ग्रामस्थांनी केला आहे. धक्कादायक बाब
परभणी (Parbhani Illegal Liquor) : जिंतूर तालुक्यातील बामणी पोलीस ठाण्याच्या हद्दीतील सावंगी भांबळे येथे तीन ठिकाणी अवैध दारू विक्री सुरू असल्याचा गंभीर आरोप ग्रामस्थांनी केला आहे. धक्कादायक बाब म्हणजे गावातील मंदिर आणि शाळेसमोरच खुलेआम दारूची विक्री होत असल्याचा दावा ग्रामस्थांनी केला असून, त्यामुळे गावात तीव्र संतापाचे वातावरण निर्माण झाले आहे.
ग्रामस्थांच्या म्हणण्यानुसार, अवैध दारू विक्रीमुळे गावातील कायदा व सुव्यवस्थेचा प्रश्न निर्माण होत असून, वारंवार भांडणे, महिलांचा छळ आणि सामाजिक अस्वस्थतेच्या घटना वाढत आहेत. वाढत्या व्यसनाधीनतेमुळे अनेक युवक आणि विद्यार्थ्यांच्या भवितव्यावरही विपरीत परिणाम होत असल्याची चिंता पालकांनी व्यक्त केली आहे. या प्रकाराविरोधात शाळेचे मुख्याध्यापक, जागरूक नागरिक आणि ग्रामस्थांनी वेळोवेळी आंदोलने केली असून, संबंधितांवर कारवाईसाठी लेखी निवेदनेही प्रशासनाला दिली आहेत. मात्र, त्यानंतरही अवैध दारू विक्री सुरूच असल्याचा आरोप ग्रामस्थांनी केला आहे.
मंदिर व शाळेसारख्या संवेदनशील परिसरात सुरू असलेली अवैध दारू विक्री तात्काळ बंद करून संबंधितांवर कठोर कायदेशीर कारवाई करावी, तसेच या व्यवसायाला संरक्षण देणाऱ्यांचाही शोध घ्यावा, अशी मागणी ग्रामस्थांनी पोलीस प्रशासनाकडे केली आहे. दरम्यान, या प्रकरणातील आरोपांबाबत बामणी पोलीस किंवा संबंधित प्रशासनाची अधिकृत भूमिका अद्याप समोर आलेली नाही. त्यामुळे या आरोपांची अधिकृत पुष्टी झालेली नसून, प्रशासनाच्या कारवाईकडे ग्रामस्थांचे लक्ष लागले आहे.