Singnapur terrible accident: परभणीमध्ये ॲपे रिक्षा आणि दुचाकीमध्ये झालेल्या भीषण अपघातात २४ वर्षीय तरुणाचा उपचारादरम्यान मृत्यू झाला. अपघातात एक जखमी झाला
ॲपे रिक्षाची दुचाकीला जोरदार धडक; एक जखमी, चालकाविरुद्ध दैठणा पोलिसांत गुन्हा
परभणी (Singnapur terrible accident) : गंगाखेड महामार्गावरील सिंगणापूर टोलनाक्याजवळ ॲपे रिक्षा आणि दुचाकीमध्ये झालेल्या भीषण अपघातात 24 वर्षीय तरुणाचा उपचारादरम्यान मृत्यू झाला. या अपघातात आणखी एक जण जखमी झाला असून निष्काळजीपणे वाहन चालवल्याप्रकरणी ॲपे चालकाविरुद्ध दैठणा पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, गंगाखेड तालुक्यातील इनामी तांडा येथील आकाश काशिनाथ राठोड (वय 24) आणि त्यांचे नातेवाईक बळीराम दगडू जाधव हे दोघे कामानिमित्त परभणी येथे आले होते. मंगळवार (दि. 2 जून) रोजी दुपारी सुमारे 4 वाजता ते मोटारसायकल (क्र. एमएच-22 बीए-9478) वरून गावाकडे परतत असताना सिंगणापूर टोलनाक्याजवळ गंगाखेडकडून परभणीकडे येणाऱ्या ॲपे रिक्षा (क्र. एमएच-22 यू-3703) चालकाने भरधाव व निष्काळजीपणे वाहन चालवत त्यांच्या दुचाकीला जोरदार धडक दिली.
या (Singnapur terrible accident) अपघातात आकाश राठोड यांच्या डोक्याला गंभीर दुखापत झाली, तर बळीराम जाधव यांचा डावा हात फ्रॅक्चर झाला. जखमींना तातडीने परभणी येथील शासकीय रुग्णालयात दाखल करण्यात आले. मात्र उपचार सुरू असताना बुधवारी (दि. 3 जून) रात्री 11.33 वाजता आकाश राठोड यांची प्राणज्योत मालवली. दरम्यान, मृत आकाश राठोड यांचे मामा शामराव शिवाजी चव्हाण यांनी दिलेल्या फिर्यादीवरून ॲपे चालकाविरुद्ध निष्काळजीपणे वाहन चालवून अपघात घडविल्याप्रकरणी दैठणा पोलीस ठाण्यात गुन्हा दाखल करण्यात आला आहे. या घटनेचा पुढील तपास पोलीस उपनिरीक्षक विशाल सूर्यवंशी करीत आहेत.